Глабальны прафсаюз IndustriALL асуджае вынясенне абвінаваўчага прысуду лідэрам прафсаюза РЭП
Памочнік генеральнага сакратара Глабальнага прафсаюза IndustriALL Кемаль Озкан. Фота: ПЦ "Вясна".
Глабальны прафсаюз IndustriALL асуджае вынясенне абвінаваўчага прысуду лідэрам прафсаюза РЭП Фядынічу і Комлік.
Мінск, 24 жніўня. Глабальны прафсаюз IndustriALL, сябрам якога з'яўляецца РЭП, асуджае вынясенне абвінаваўчага прысуду лідэрам прафсаюза РЭП Генадзя Фядынічу і Ігару Комліку. Пра гэта заявіў журналістам БелаПАН памочнік генеральнага сакратара Глабальнага прафсаюза Кемаль Озкан, які прысутнічаў на судзе.
"Гэта вельмі сумны дзень для Беларусі, таму што Фядыніч і Комлік - гэта найбольш паважаныя асобы ў IndustriALL па сваіх дзелавых і чалавечых якасцях. І мне вельмі шкада, што я прысутнічаў на такім журботным мерапрыемстве, як абвяшчэнне прысуду", - сказаў Озкан.
"Я прадстаўляю тут 50 млн чалавек з 154 краін. І хачу з упэўненасцю заявіць, што ні ў адной краіне свету такі працэс немагчымы. Адзінае, чым яны займаліся, - абаранялі правы работнікаў, а гэта ні ў якім разе не з'яўляецца злачынствам", - сказаў ён.
Прадстаўнік IndustriALL нагадаў, што на апошняй канферэнцыі Міжнароднай арганізацыі працы ў Жэневе Беларусь была ўключана ў кароткі спіс краін, якія парушаюць правы чалавека, у тым ліку правы прафсаюзаў і іх членаў. "Гэты прысуд яшчэ раз пацвердзіў нашы разумныя і правільныя апасенні наконт сітуацыі ў Беларусі", - дадаў Озкан.
Ён выказаў надзею, што пры абскарджанні прысуд будзе цалкам адменены. "Мы зробім усё магчымасці, каб аказаць ціск на ўлады Беларусі і каб інфармацыя пра вынікі гэтага працэсу была максімальна шырока распаўсюджаная па ўсім свеце", - сказаў у заканчэнне памочнік генеральнага сакратара IndustriALL.
Старшыня прафсаюза работнікаў радыёэлектроннай прамысловасці (РЭП) Генадзь Фядыніч і кіраўнік мінскай гарадской арганізацыі, бухгалтар прафсаюза Ігар Комлік прысуджаныя да чатырох гадоў абмежавання волі без накіравання ў папраўчую ўстанову і без канфіскацыі маёмасці. Да ўступлення прысуду ў сілу яны павінны знаходзіцца пад падпіскай аб нявыездзе і на працягу пяці гадоў не маюць права займаць кіруючыя пасады. Такі прысуд абвясціў 24 жніўня суд Савецкага раёна Мінска пад старшынствам суддзі Марыны Фёдаравай. Суд таксама пастанавіў спагнаць з Фядыніча і Комліка больш за 47 тыс. рублёў у даход дзяржавы.
