«Паедзем паядзім» патрабуе крымінальнага пераследу абаронцаў Курапатаў Дакумент Дапоўнена
Павел Севярынец падпісвае пратакол 3 кастрычніка. Фота Іллі Дабратвора
Сустаршыня “Беларускай Хрысціянскай Дэмакратыі” Павел Севярынец атрымаў позву ў Бараўлянскае аддзяленне міліцыі Мінскага РУУС.
Палітык выклікаецца на 10 гадзін раніцы 29 кастрычніка як “удзельнік крымінальнага працэсу”.
Пакуль невядома, у якой якасці выкліканы Севярынец.
Пазней палітык паведаміў на сваёй старонцы ў фэйсбуку: "Патэліў участковаму па нумары, указаным у павестцы. Ён кажа, праводзіцца праверка па заяве кіраўніцтва рэстарацыі. Справа яшчэ не ўзбуджаная, але матэрыялы праверкі быццам бы ў адпаведнасьці з 173, 174 КПК будуць перадавацца ў следчы ворган для вырашэньня, ці ўзбуджаць справу (вырашаць будуць "наверсе", зразумела)”.
Праваабаронцы паведамляюць, што такія ж позвы былі ўручаныя іншым абаронцам Курапат - Змітру Дашкевічу і Ганне Шапуцька.
