Праваабарончая праграма "Вясна" на Беларускім Радыё Рацыя Аўдыё
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” - праграма "Вясна", якая асвятляе падзеі, датычныя правоў чалавека ў Беларусі.
Анонс выпуска:
“Хроніка”: Сябру Праваабарончага цэнтру Вясна з Магілева Алесю Буракову пагражаюць крымінальнай справай за працу ад імя незарэгістраванай аргаанізацыі; Фігурантам “справы БелТА” выстаўлены абвінавачванні; Гомельскага журналіста-фрылансера Кастуся Жукоўскага зноў асудзілі на 30 б.в. за незаконны выраб інфармацыйнай прадукцыі СМІ.
“Падзея”: Дзявятага лістапада Мінскі гарадскі суд пакінуў у сіле рашэнне раённага суда па справе прафсаюзных лідэраў Генадзя Фядыніча і Ігара Комліка, а іх апеляцыйную скаргу без задавальнення. Такім чынам абвінаваўчы прысуд па артыкуле аб ухіленні ад выплаты падаткаў у буйным памеры пакінуты ў сіле. Фядыніч і Комлік мусяць адбыць чатыры гады хатняй хіміі з забаронай займаць кіруючыя пасады тэрмінам на 5 гадоў. Фігуранты справы, а таксама тыя, хто прыйшоў іх падтрымаць, распавялі пра свае ўражанні ад працэса і ўвогуле ад справы. Таксама рашэнне гарадскога суда каментуе праваабаронца Валянцін Стэфановіч.
“Асоба”: Жыхарка Смаргоні Наталля Змітровіч, сына якой напачатку года пры затрыманні збілі супрацоўнікі міліцыі. Прымяненні сілы і катаванні не былі нічым абгрунтаваныя. Жанчына вырашыла дамагацца справядлівасці і ўжо амаль год судзіцца ды піша скаргі ў розныя інстанцыі. Яе сыну Барысу ўдалося даказаць у судзе сваю невінаватасць па адміністрацыйных артыкулах, па якіх яго абвінавачвалі. Аднак Наталля Змітровіч настроена пакараць саміх міліцыянтаў за гвалтоўныя дзеянн ў дачыненні да яе сына.
У музычных паўзах – кампазіцыі ў выкананні гурта Stary Olsa.
