Што варта змяніць у беларускай Канстытуцыі?
Ілюстрацыйнае фота
Праваабаронца "Вясны" Валянцін Стэфановіч распавёў "Радыё Рацыя" пра тое, якімі, на яго погляд, павінны быць змены ў Канстытуцыі Беларусі.
Звяртаючыся з пасланнем да беларускага народа і дэпутатаў, беларускі кіраўнік сказаў пра тое, што наспеў час унясення змяненняў у Канстытуцыю. Што найперш трэба змяніць у Асноўным законе?
Валянцін Стэфановіч: На мой погляд, для пачатку варта было б вярнуцца да варыянта Канстытуцыі, які быў да 1996 года, таму што там быў больш замацаваны падзел галінаў улады і прапісаны ўзаемныя кантралюючыя механізмы гэтых галін. Улада менш канцэнтравалася ў адных руках. Зрэшты, можна разглядаць і іншыя варыянты зменаў, але найперш трэба зыходзіць з таго, што збіраемся браць за мадэль далейшага развіцця краіны. Напрыклад, можна ўзяць досвед некаторых еўрапейскіх краін, калі казаць пра выбарчую сістэму. Калі парламент фармуецца з палітычных партый і фракцый, і тая партыя, што перамагла на выбарах, фармуе ўрад.
РР: Але гэта больш парламенцкая форма праўлення, і там асноўныя кіруючыя функцыі знаходзяцца ў прэм’ер-міністра, а прэзідэнт – гэта больш прадстаўнічая фігура.
Валянцін Стэфановіч: Такія змены варта разглядаць, калі будзе імкненне нешта радыкальна змяніць у падзеле галін улады. Але пасля рэферэндума 1996 года беларуская ўлада сканцэнтравана ў Беларусі ў адных руках, і гэта прывяло да таго, што ўсе астатнія галіны не з’яўляецца незалежнымі. Мяркую, у гэтым плане тыя, хто сёння пры ўладзе, нічога змяняць не будуць.
Навіны ад Spring96.org у Telegram. Падпішыся на наш канал https://t.me/viasna96
