Права на адукацыю ці абавязак бараніць краіну? Прапануем абмеркаваць на канферэнцыі

Як суадносяцца права на адукацыю і абавязак абараняць краіну? Што з гэтага больш важкае і матэрыяльнае - акадэмічныя свабоды ці позва ў ваенкамат? Прапануем разам пашукаць адказы на канферэнцыі па тэме “Змены ў заканадаўства “Аб адтэрміноўках” і Правы чалавека”, якая адбудзецца восьмага верасня на адукацыйна-асветніцкай пляцоўцы “Тэрыторыя правоў”.

Падчас Канферэнцыі плануецца абмеркаванне зменаў у заканадаўстве, якія датычацца прадастаўлення адтэрміновак для службы ў войску, і магчымых наступстваў ад прыняцця закона ў звязку з правам чалавека на адукацыю.

На мерапрыемстве будуць абмяркоўвацца наступныя пытанні:

• Наколькі закон “Аб адтэрміноўках” закранае права на адукацыю, замацаванае у Канстытуцыі Беларусі і Міжнародным Пакце аб сацыяльных і эканамічных правах?
• Якія сацыяльна-эканамічныя наступствы для грамадства ад такіх новаўвядзенняў?
• Перапынак ў атрыманні адукацыі (перад магістратурай ці аспірантурай) – ці магчымае навуковае жыццё пасля войска?
• Адукацыя за мяжой – ці стане новы закон перашкодай для акадэмічнай мабільнасці?
• Ці ёсць ў войску магчымасці для захавання адпаведнага прафесійнага узроўня ведаў (наяўнасць каналаў камунікацыі са знешнім светам, вольны час на самаадукацыю)?

У канферэнцыі прымуць удзел праваабаронцы з Праваабарончага цэнтру “Вясна”, экспертка Украінскай Асацыяцыі Студэнтаў Ліза Шчапяцільнікава, сябра Грамадскага Балонскага камітэту Уладзімір Дунаеў, прадстаўнікі Задзіночання беларускіх студэнтаў.

Месца і час правядзення: “Тэрыторыя правоў” (вул. Ложынская, 16, пам. 404), 8 верасня (нядзеля), пачатак у 11.30.

Уваход вольны.

Што мяняе закон "Аб адтэрміноўках"?

Якія асноўныя новаўвядзенні прадугледжвае закон і чаму людзі супраць — у разборы Еўрарадыё.

 Навіны ад Spring96.org у Telegram. Падпішыся на наш канал https://t.me/viasna96