Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Апытанка: Распачаўся паглыблены тэматычны курс па правах чалавека, які зладзіла рада адукацыйна-асветніцкай праграмы “Беларуская праваабарончая школа”. Навучэнцы курса распавядаюць, чаму вырашылі прыняць у ім удзел.
Падзея: Старшыня Праваабарончага цэнтра “Вясна” Алесь Бяляцкі ўзнагароджаны медалём да 100-годдзя Беларускай Народнай Рэспублікі. Рада БНР вырашыла ўзнагародзіць праваабаронцу ў знак прызнання заслугаў дзеля беларускай незалежнасці і дэмакратыі.
Каментар эксперта: ў Мінску прайшла канферэнцыя пад назвай "Грамадская думка і смяротнае пакаранне ў Беларусі". На мерапрыемстве прысутнічаў і каардынатар кампаніі “Праваабаронцы супраць смяротнага пакарання ў Беларусі” Андрэй Палуда. У рубрыцы ён выказвае меркаванне, ці сапраўды патрэбна падтрымка грамадскасці і рэферэндум для таго, каб адмяніць смяротнае пакаранне ў Беларусі.
Асоба: Цяжкасці ў атрыманні працы, ціск міліцыі, дрэннае стаўленне грамадства… з усім гэтым сутыкаюцца ромы ў Беларусі. Падрабязней — у аповядзе ромскай жанчыны Аксаны.
Каментар: Беларусь была 160-й краінай ў свеце, якая прыняла Канвенцыю аб правах людзей з інваліднасцю. Але дагэтуль не падпісала яе факультатыўны пратакол, бо ён дазваляе кожнаму грамадзяніну паскардзіцца на дзяржаву. Пра акалічнасці адносінаў Беларусі і гэтай Канвенцыі распавядае дырэктар Офіса па правах людзей з інваліднасцю Сяргей Драздоўскі.
У музычных паўзах — кампазіцыі ў выкананні Brutto.
