Павел Сапелка: Адзіным законным прысудам Паліенку быў бы прысуд апраўдальны Аўдыё

Юрыст Праваабарончага цэнтра "Вясна" Павел Сапелка каментуе прысуд, вынесены сацыяльнаму актывісту Дзмітрыю Паліенку Мінскім гарадскім судом 25 кастрычніка.

Нагадаем, пракурор запрасіў суд прызнаць Паліенку вінаватым па ч. 3 арт. 339 Крымінальнага кодэкса (асабліва злоснае хуліганства) - па факце распылення пярцовага газу ў твар мужчыне на лесвічнай пляцоўцы і прызначыць пакаранне ў выглядзе пазбаўлення волі тэрмінам на шэсць гадоў, а на падставе закона «Аб амністыі» скараціць тэрмін на адзін год. Таксама прымусова лячыць ад алкагалізму, а меру стрымання ў выглядзе заключэння пад варту пакінуць без зменаў.

Сёння суддзя Пётр Арлоў абвясціў прысуд: 3 гады "хатняй хіміі" (абмежаванне волі без накіравання ў выпраўленчую ўстанову) з падпіскай аб нявыездзе і прымусовым лячэннем ад алкагалізму.

Павел Сапелка перакананы, што адзіным законным прысудам па гэтай справе быў бы апраўдальны прысуд і вось чаму:

"Паколькі, я так разумею, суды ў нас не настолькі незалежныя, каб прыняць такое рэвалюцыйнае рашэнне - вынесці апраўдальны прысуд па такой адкрыта палітычнай справе, то быў вынесены, скажам прама, досыць мяккі прысуд, хоць, вядома трэба разумець, што гэта ўсё роўна крымінальнае пакаранне, якое накладае пэўныя абмежаванні, і невыкананне гэтых абмежаванняў можа стаць падставай для новага асуджэння і накіравання ў месцы пазбаўлення волі Паліенку.

Што да прымусовага лячэння ад алкагалізму па рашэнні суда - наколькі абгрунтаванае гэта рашэнне? Эксперт выказаўся адносна неабходнасці лячэння. Наколькі я разумею, эксперт не ўлічыў многіх абставінаў, на якія пасля паказвала абарона ў судовым пасяджэнні, таму наўрад ці гэта абгрунтаванае рашэнне.

Калі падсумоўваць усё сказанае, то варта вітаць той факт, што абвінавачанне адмовілася ад адкрыта палітычных артыкулаў абвінавачвання (распальванне сацыяльнай варажнечы і абразу службовай асобы). З чыста чалавечага пункту гледжання варта парадавацца за Дзмітрыя, які ўжо сёння апынецца сярод сваіх сяброў і блізкіх".

Павел Сапелка адзначыў, што канчатковая пазіцыя праваабарончых арганізацый будзе выказана пазней, пасля вывучэння ў поўным аб'ёме прысуду па крымінальнай справе.

Навіны ад Spring96.org у Telegram. Падпішыся на наш канал https://t.me/viasna96