Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Хроніка: Толькі за два дні судоў (5 і 6 снежня) актывісты атрымалі штрафы агульным памерам у 15555 рублёў. 7 і 8 снежня прайшлі акцыі супраць паглыбленай інтэграцыі з Расеяй. Сакаардынатарка маніторынгу мірных сходаў Наталля Сацункевіч пракаментуе, як разгортваліся падзеі.
Падзея: 10 снежня адзначаеца Дзень правоў чалавека. Менавіта ў гэты дзень у 1948 годзе Генеральная Асамблея ААН прыняла Ўсеагульную Дэкларацыю правоў чалавека. Чаму гэта падзея была важнай тады і чаму застаецца актуальнай і сёння, распавядзе праваабаронца Андрэй Палуда.
Каментар: “Вечар без гвалту” і падпісанне паштовак, лекцыя-дыскусія “Гендэрны гвалт – гэта толькі пра жанчын?”, спектакль “Родныя людзі” — усе гэтыя мерапрыемствы прайшлі падчас “16 дзён актывізму супраць гендарнага гвалту”, якія заканчваюцца 10 снежня. Свае каментары дадуць актывісткі Аляксандра Савініч і Марыша Корж (“Маршыруй, дзетка”), а таксама Дар’я Чурко і Анна Філістовіч (Цэнтр па прасоўванню правоў жанчын “Яе правы”).
Каментар эксперта: 3 снежня адзначаўся Міжнародны дзень людзей з інваліднасцю. Ці ёсць адрозненні ў успрыманні гэтага дня паміж дзяржавай і недзяржаўнымі грамадскімі арганізацыямі, якія займаюцца праблемай інваліднасці? Адкажа Сяргей Драздоўскі, дырэктар Офіса па правах людзей з інваліднасцю.
У музычных паўзах – кампазіцыі ў выкананні BY CRY.
