Клуб ангельскай мовы пра правы чалавека запрашае на заняткі
20 студзеня Клуб ангельскай мовы пра правы чалавека запрашае на занятак — першы ў новым, 2020 годзе. Разам з праваабаронцам ПЦ "Вясна" Валянцінам Стэфановічам вы зможаце ацаніць сітуацыю з правамі чалавека у Беларусі за 2019 год. У выніку — даведаецеся, што дакладна адказваць родным і сябрам на пытанні пра правы чалавека, а таксама вывучыце новыя словы і пазнаёміцеся з цікавымі людзьмі.
Валанцёрская служба "Вясны" сабрала пытанні і адказы, каб было лягчэй зразумець, ці пасуюць вам заняткі Клуба ангельскай мовы пра правы чалавека:
Не разумею, дык а што гэта дакладна такое?
Гэта штотыднёвыя двухгадзінныя сустрэчы, дзе размаўляюць пра правы чалавека на ангельскай мове. Кожны занятак прысвечаны асобнай тэме.
А што вы там робіце?
Шмат чаго: глядзім відэа; вучым новыя словы; выказваемся і дыскутуем пра правы чалавека; робім практыкаванні; чытаем і крыху пішам; размаўляем у парах, тройках, чацверках і г.д., разгадваем красворды; малюем; жартуем і сябруем!
Дзе гэта праходзіць?
10 хвілін пешшу ад мятро Уручча, кожны панядзелак, пачатак у 19:00
Я не змагу 20-га студзеня, што рабіць?
Запаўняй форму і прыходзь на наступныя заняткі, ніякіх праблем.
А які ўзровень ведання мовы трэба? Як дазнацца мой узровень?
Неабходны ўзровень валодання мовай — pre intermediate і вышэй. Прайсці 10-хвілінны тэст можна ТУТ.
Гэта бясплатна? Чаму?
Так, гэта цалкам бясплатна. Бо мы лічам, што веды і магчымасці павінны быць у кожнага чалавека.
А ў вас прафесійныя выкладчыкі?
У нас няма выкладчыкаў, ёсць вядоўцы (ці мадэратары), якія прапаноўваюць праграму занятка і сочаць за таймінгам. Таксама на заняткі ў якасці гасцей часам запрашаюцца вядомыя грамадскія дзеячы і праваабаронцы.
А якія правілы наведвання?
Мы просім паважаць іншых і не спазняцца.
А мае памылкі будуць выпраўляць?
Мы не выпраўляем памылкі, але заўсёды гатовы падказаць і адказаць ;-)
Там ужо ўсе людзі ведаюць адзін аднаго, мне няёмка...
Частка людзей сапраўды ведаюць адзін аднаго, але на кожным занятку ёсць новыя людзі. Таксама, ты можаш запрасіць сябра ці сяброўку і прыйсці разам).
Я саромеюся размаўляць на ангельскай...
Тады гэты Клуб як раз для цябе, бо мы руйнуем моўныя бар’еры.
А можна проста сядзець і слухаць?
Мы заахвочваем людзей размаўляць, але не прымушаем. Пры гэтым, на кожнай сустрэчы ёсць заданне і магчымасць выказацца кожнаму і кожнай.
Я не магу хадзіць кожны тыдзень, што рабіць?
Прыходзь як атрымліваецца, мы не адлічаем за “прагулы”
Я нічога не ведаю пра правы чалавека...
Ніякіх спецыфічных ведаў не патрабуецца. Правы чалавека — гэта вельмі шматслаёвая з'ява, з якой мы сутыкаемся кожны дзень.
А хатняя праца будзе?
Часам ёсць, часам не) Выкананне не абавязковае, але дапамагае падвысіць твой узровень.
А носьбіты ангельскай мовы ёсць у вас?
Так, часам мы запрашаем носьбітаў мовы, цікавых гасцей, экспертаў і экспертак.
А можна неяк уплываць на праграму?
Безумоўна, Клуб адкрыты для прапаноў і ініцыятывы.
Ну чаму панядзелак, гэта ж так нязручна?
Немагчыма знайсці дзень зручны для ўсіх :-( Да таго ж, з панядзелка добра пачынаць новае жыццё, у якім ты ведаеш ангельскую мову лепей.
У мяне засталося пытанне!
Тэрмінова пішы на help@spring96.org :-)
А каб запісацца ў Клуб, трэба запоўніць ФОРМУ. Першы занятак у панядзелак 20.01.2020 у 19.00, на пляцоўцы Тэрыторыя правоў (г. Мінск, вул. Ложынская, 16, памяшканне 404).
Прыходзь і памятай, што ангельская мова сама сябе не вывучыць!
