Працягваецца "паляванне" на юнака, які апублікаваў калаж пра міліцыянта і пракурора
Іван Красоўскі, фота з Facebook
Яшчэ 4 красавіка на жыхара Заслаўя Івана Красоўскага склалі пратакол за “дэманстрацыю нацысцкай сімволікі” (арт. 17.10 КаАП). Каб скласці адміністрацыйны пратакол, хлопца затрымалі і прывезлі ў РАУС Заслаўскага раёна. З дома Красоўскага пад час ператрусу забралі жорсткі дыск і камеру GoPro. Пасля складання пратакола яго адпусцілі.
Івана падазраюць у тым, што ён нібыта апублікаваў у адным з беларускіх адкрытых тэлеграм-чатаў карцінку-калаж, дзе ўтрымлівалася выява сцягу Трэцяга рэйху. А менавіта – фотаздымак міліцыянта і дзяржаўнага абвінаваўцы (якія выступалі на судзе Мікіты Емяльянава і Івана Комара), на адзенні якіх і былі дамаляваныя сцягі.
10 красавіка Красоўскі паведаміў, што ўчастковы знайшоў яго ў Мінску у знаёмых і спрабаваў затрымаць ізноў:
“Толькі што спрабавалі мяне незаконна затрымаць, у майго сябра дома. Казалі, што хочуць завезці на суд, хоць позва мне так і не прыйшла (за пару гадзін да суда тэлефанаваў участковы і хацеў мяне таксама забраць на нібыта «гутарку перад судом, каб удакладніць некаторыя дадзеныя і адправіць дакументы на суд які будзе праз пару дзён», я адмовіўся”, - паведаміў Красоўскі.
Зараз Іван сядзіць дома ў свайго знаёмага, пад наглядам міліцыянтаў.
