Суды над маладафронтаўцамі перанеслі з-за каранавіруса Дапоўнена
У судзе Маскоўскага раёна Мінска 7 траўня мусіў распачацца суд над маладафронтаўцамі Дзянісам і Максімам Урбановічамі, Віталём Трыгубавым паводле артыкула 23.34 КаАП (парушэнне арганізацыі ці правядзення масавых арганізацый) за пікет 25 сакавіка.
- Фота з сацыяльных сетак
Такім пікетам міліцыянты з РУУС Маскоўскага раёна Мінска палічылі ўскладанне кветак 25 сакавіка да будынку, дзе была абвешчана незалежнасць БНР, і фотаздымак з бел-чырвона-белым сцягам, зроблены тады ж. Прычым Максіму Урбановічу ў віну ставіцца тое, што ён трымаў нават не сцяг, а шалік з гербам “Пагоня” і надпісам “Беларусь жыве вечна”.
Дапоўнена. Як паведаміў "Вясне" актывіст "Маладога Фронта" Віталь Трыгубаў, суды над трыма актывістамі суддзя суда Маскоўскага раёна Мінска Таццяна Матыль перанесла на 15 траўня на 12:00. Прычына – пандэмія каранавіруса.
Нагадаем, гэта не першы выпадак, калі ўскладанне кветак расцэньваецца як несанкцыянаванае масавае мерапрыемства. У кастрычніку мінулага года тых жа маладафронтаўцаў – Дзяніса Урбановіча і Віталя Трыгубава асудзілі на 40 базавых велічынь штрафу кожнаму за ўскладанне кветак да помніка Янкі Купалы. Пратакол тады таксама быў складзены на падставе фота, зробленага актывістамі каля помніка.
