Блогеру Ціханоўскаму, які сядзіць у ІЧУ, далі яшчэ 15 сутак арышту
Сяргей Ціханоўскі ў Гомельскім абласным судзе 7 лютага
Суд Савецкага раёна Гомеля 18 траўня асудзіў блогера Сяргея Ціханоўскага, які адбывае 15-дзённы арышт у ІЧУ Гомеля, яшчэ на 15 дзён арышту. Пра гэта TUT.BY распавялі ў канцылярыі суда.
15 сутак Ціханоўскі атрымаў за адміністрацыйнае правапарушэнне. За якое менавіта і калі яно было здзейснена, у канцылярыі суда ўдакладніць не змаглі. Такім чынам, Ціханоўскі выйдзе на волю толькі 5 чэрвеня.
Сяргея Ціханоўскага затрымалі шостага траўня пад Магілёвам. Ён змешчаны ў ізалятар часовага ўтрымання Гомеля. Падставай для затрымання блогера стала пастанова суда Савецкага раёна горада Гомеля аб адміністрацыйным арышце, вынесеная яшчэ ў студзені. А менавіта пастанова аб 15 сутках арышту за ўдзел у акцыі супраць інтэграцыі з Расеяй 20 снежня. Блогер быў асуджаны па ч.1 арт. 23. 34 Каап (удзел у несанкцыянаваным масавым мерапрыемстве).
Пераслед блогераў: Затрыманы Сяргей Ціханоўскі і Сяргей Пятрухін
Будучы ў ІЧУ, Ціханоўскі заявіў, што мае намер прыняць удзел у прэзыдэнцкіх выбарах. Яго давераная асоба - жонка Святлана - падала ў ЦВК дакументы на рэгістрацыю ініцыятыўнай групы, але ЦВК адмовіўся рэгістраваць групу Сяргея Ціханоўскага. Пасля адмовы Святлана Ціханоўская падала ў ЦВК дакументы на рэгістрацыю ініцыятыўнай групы па вылучэнні яе ў якасці кандыдата ў прэзідэнты.
