У Вярхоўным судзе затрымалі 7 чалавек, якія прыйшлі падтрымаць "кандыдатаў пратэсту" Дапоўнена
Акцыя групы "кандыдатаў пратэсту" каля ЦВК 15 траўня. Фота: Радыё Свабода".
У Мінску прама ў залах Вярхоўнага суда затрымалі людзей, якія прыйшлі на суд падтрымаць незарэгістраваных “кандыдатаў пратэсту” ад Мікалая Статкевіча. Пра гэта праваабаронцам “Вясны” паведаміла яго жонка Марына Адамовіч.
Па словах Адамовіч, былі затрыманыя 7 чалавек, сярод іх актывісты Сяргей Спарыш, Арцём Бабок, "кандыдатка пратэсту" Анжаліка Жэлезнякова, Тамара Патоцкая, Уладзімір Неўмяржыцкі.
Пазней быў затрыманы Валянцін Фралоў, які таксама прысутнічаў у Вярхоўным судзе. Пазней яго адпусцілі.
Таксама затрыманы Юлія Лемехава і Дзмітрый Місюк.
Людзі ў цывільным заходзілі ў судовыя залы, дзе ў той час ішло абскарджванне пастановаў Цэнтрвыбаркаму аб нерэгістрацыі часткі ініцыятыўных груп, і выводзілі людзей уніз да аўтобуса. Тры супрацоўніка міліцыі ў форме, якія таксама там знаходзіліся, ніяк не ўмешваліся.
Сяргей Спарыш паспеў зняць кароткае відэа падчас аднаго з затрыманняў.
Па апошняй інфармацыі, усіх затрыманых даставілі ў РУУС Цэнтральнага раёна Мінска.
Дапоўнена: Пасля васьмі вечара жонцы Сяргея Спарыша пацвердзілі, што яе мужа перавезлі ў Цэнтр ізаляцыі правапарушальнікаў. Верагодна, астатнія затрыманыя таксама правядуць ноч там.
Інфамацыя будзе дапаўняцца.
