У Гродне да і падчас "ланцугу салідарнасці" адбыліся затрыманні Дапоўнена

У Гародні 26 чэрвеня затрымалі сябра ініцыятыўнай групы Святланы Ціханоўскай Яўгена Амплеева. Пра гэта "Вясне" паведаміла каардынатарка ініцыятыўнай групы па Гарадзеншчыне Вольга Каракіна.

Яўген паспеў паведаміць, што ў арыентыроўцы міліцыі ўказана яго прозвішча і нумар яго аўтамабіля, які трэба таксама затрымаць. Прычына затрымання невядома. Амплеева павезлі ў РАУС Ленінскага раёна Гродна. Там на яго склалі пратакол па адміністрацыйным артыкуле і змясцілі ў ізалятар да суда ў панядзелак. 

Гэта не першае затрыманне сябраў ініцыятыўнай групы Святланы Ціханоўскай у Гродне пасля пікету 29 траўня, пасля якога пачалася "справа Ціханоўскага". Падчас працы на пікетах у розныя дні затрымлівалі Вольгу Каракіну і Юлію Карначаву. Дзяўчын адпусцілі, але у доме Каракінай правялі вобшук, а на Карначаву склалі пратакол за "дробнае хуліганства". Пазней дзяўчыну асудзілі на 520 рублёў штрафу. 

Дапоўнена: Таксама ўвечары на акцыі "Ланцуг салідарнасці" былі затрыманы як мінімум два чалавекі. Адзін з іх мужчына з плакатам "Стоп таракан". Другі - Павел Мількоўскі. Ён затрыманы разам з аўтамабілем.

Фота "Радыё Рацыя"

Таксама ДАІ затрымала мастоўскага актывіста каманды Ціханоўскага Аляксандра Мілюка, які ехаў з Мастоў ў Воранаўскі раён да бацькоў.