«Я спужаўся. Вельмі спужаўся». Што расказвае чалавек, якога міліцыя прымусіла выбачыцца на відэа
МУС распаўсюдзіла відэа, на якім мужчына плача і абяцае не рабіць нічога супрацьпраўнага. "Радыё Свабода" пагаварыла з Аляксандрам Новікам, якога аштрафавалі за фота аўтазака па арт. 23.4 КаАП, і юрыстам Праваабарончага цэнтра "Вясна" Валянцінам Стэфановічам.
«Я спужаўся. Вельмі спужаўся»
«Нуль трэцяга нуль сёмага я здымаў супрацоўнікаў у парку проста па дурасці. Для таго каб проста хайпануцца ў гэтым тэлеграме. Я ў далейшым абяцаю, што я больш ніколі не буду нічога рабіць супрацьзаконнага і супрацьпраўнага», — плача на відэа мужчына.
Чалавек на відэа — 32-гадовы маладачанец Аляксандар Новік. У яго эпілепсія. Відэа, па ягоных словах, запісалі пасля таго, як ён суткі правёў у камеры Маладачанскага РАУС.
Аляксандар Новік кажа, што сапраўды сфатаграфаваў міліцыянтаў, але не аказваў ім аніякага супраціву.
«3 ліпеня я сфатаграфаваў міліцыянтаў за амфітэатрам, — кажа Аляксандар. — Проста хацеў паказаць, чым займаецца міліцыя».
Далей ён кажа, што да яго падышоў міліцыянт, прадставіўся і папрасіў праследаваць за ім. «Я сказаў, што пайду сам», — кажа мужчына.
Аляксандар апісвае, што міліцыянты хацелі ўзяць яго пад рукі, ён напалохаўся, падняў рукі і зрабіў крок назад. Але яго пад рукі завялі ў аўтамабіль і адвезлі ў РАУС на Галіцкага.
У сваім паведамленні МУС піша, што ў адказ на заўвагу міліцыянта «мужчына стаў паводзіць сябе задзірліва, здымаў тое, што адбываецца, на тэлефон і не падпарадкоўваўся законным патрабаванням супрацоўнікаў міліцыі».
«Гэта няпраўда, — кажа Аляксандар. — Гэтага дакладна не было. Я сказаў, што я пайду сам. Я спужаўся. Вельмі спужаўся. Шмат жа і відэа ёсць у інтэрнэце, дзе міліцыя б’е людзей».
Па словах Аляксандра, яго затрыманне было зафіксавана на відэа. «Там усё відаць, як усё было», — кажа Аляксандар. Гэтае відэа паказвалі пасля ў судзе.
«На мяне склалі пратакол за непадпарадкаванне супрацоўніку, — апісвае Аляксандар тое, што адбывалася ў РАУС. — Што махаў рукамі і не хацеў садзіцца ў машыну».
Пратакол Аляксандар падпісаў. «Напалохаўся, каб нічога такога не было», — кажа ён.
Яго адправілі ў камеру, дзе былі яшчэ 5 затрыманых. На відэа для МУС запісалі праз суткі.
«Мне нейкі начальнік сказаў, што відэа будзе страхоўкай на выпадак, калі мяне затрымаюць паўторна», — апісвае Аляксандар працэс здымання на відэа. Прозьвішча «начальніка» ён ня памятае.
«Калі ў такіх умовах знаходзішся, і не на такое пагодзішся», — кажа ён. На пытанне, ці сапраўды ён плача на відэа, ён адказвае «так» і тлумачыць, што ад моманту затрыманьня быў у вельмі ўзрушаным стане.
Інваліднасці ў Аляксандра няма. Але ў 19-гадовым узросце пасля смерці сябра ад анкалогіі ён перажыў моцны стрэс.
«Ён быў сябрам дзяцінства, самым блізкім, мы разам раслі, — кажа мужчына. — У мяне быў шок, пасьля апатыя, я ня еў, нэрвовы зрыў быў. І пасля стала эпілепсія».
З прычыны дыягназу Аляксандра не ўзялі ў войска. Пра тое, што ў яго эпілепсія, ён казаў у міліцыі, калі там спыталіся, чаму не служыў.
Новік кажа, што ў РАУС яму не пагражалі і не прымянялі да яго фізічную сілу.
У камеры ў Маладачанскім РАУС ён правёў трое сутак. 6 ліпеня суддзя Южык прысудзіла яму па артыкуле 23.4 «Непадпарадкаванне супрацоўнікам міліцыі» штраф у 10 базавых. Копія рашэння суду і даведка з РАУС ёсць у рэдакцыі. У рашэнні суду гаворыцца, што Новік у судзе прызнаў віну.
Аляксандар працуе на прыватным прадпрыемстве.
«Я харошы работнік, заўжды паўсюль дапамагаю, ніколі ня п’ю, ніводнага загулу-прагулу. Калі трэба характарыстыка, можаце там запатрабаваць», — кажа Аляксандар.
На пытанне, як ён ставіцца да таго, што відэа з ім цяпер размешчана ў інтэрнэце, ён кажа: «Кожны вырашае сам, што і як рабіць у гэтым жыцці».
«Гэта прыніжэнне асобы»
Юрыст Праваабарончага цэнтру «Вясна» Валянцін Стэфановіч на просьбу Радыё Свабода тлумачыць, ці мае права міліцыя запісваць падобныя відэа:
«У ПВКаАП, які рэгулюе працэдуру вядзення адміністрацыйнага працэсу, такія вось дзеянні не прадугледжаныя, — кажа Стэфановіч. — Яны (органы. — РС) маюць права ўзяць тлумачэньні ў асобы, у дачыненні да якой вядзецца адміністрацыйны працэс, скласці пратакол, правесці іншыя дзеянні кшталту дактыласкапіі, відэафіксацыі».
"Вось гэтае відэа — гэта што за форма працэсуальнага дзеяння?" — пытаецца юрыст.
Ён згадвае, што падобны выпадак быў пры міністру Ігару Шуневічу. Тады на відэа выбачаўся падлетак, які дакрануўся да фігуры гарадавога ў Мінску.
«Гэта абсалютна незаконныя дзеянні міліцыі, — сцвярджае юрыст Стэфановіч. — Як орган, які вядзе адміністрацыйны працэс, яны павінны былі чалавеку растлумачыць ягоныя правы. А гэта прыніжэнне асобы, я лічу. І тым больш дэманстрацыя потым гэтага (відэа. — РС). Аніякага дачынення да працэдуры вядзення адміністрацыйнага працэсу і разгляду яго ў судзе гэта не мае».
«Я параіў бы абскардзіць дзеянні супрацоўнікаў міліцыі, — кажа Валянцін Стэфановіч. — Гэта незаконна і амаральна».
