Пасля 75 сутак арышту Паўла Севярынца падазраюць у арганізацыі масавых беспарадкаў
Павел Севярынец. Фота: Надзея Гацак
Cустаршыня аргкамітэта для стварэння партыі Беларуская хрысціянская дэмакратыя і палітвязень Павел Севярынец не выйдзе на волю пасля адбыцця адміністрацыйнага арышту тэрмінам у 75 сутак.
Як паведаміла ў сацыяльных сетках Таццяна Севярынец, Павел затрыманы паводле артыкула 108 Крымінальна-працэсуальнага кодэксу ( затрыманне на 72 гадзіны па па непасрэдна ўзнікшаму падазрэнню ў здзяйсненні злачынства).
Аднак рэальна Севярынца падазраюць у здзяйсненні злачынства па артыкуле 293 КК (Масавыя беспарадкі). І гэта пры тым, што палітык больш чым два месяцы правёў за кратамі.
«Самае брыдкае, што на яго заводзяць крымінальную справу пасьля вялікага тэрміну арышту, у апошнюю хвіліну, калі ён ўжо рыхтаваўся выйсьці на волю, ён там нямыты, няголены, і вось яго не выпускаюць нават на дзень, каб ён сям’ю пабачыў. Так яго баяцца, што ён тут рэвалюцыю арганізуе», — сказала Радыё Свабода жонка палітыка Вольга Севярынец.
