У Гародні ў суботу ізноў пачалі затрымліваць
Затрыманне ў Гародні 22 жніўня. Скрыншот з відэа hrodna.life
Гарадзенскія затрыманні зноў пачалі набываць масавы характар. У горадзе над Нёманам 22 жніўня на плошчы Леніна, на якой гарвыканкам абяцаў дазваляць збірацца людзям на мірныя акцыі, а пасля забараніў, усё ж адбыліся два мерапрыемствы. Першае было днём, і было яно праўладным.
А вось на вячэрняй акцыі, на якую па традыцыі выйшлі тыя, хто не згодны з агучанымі ЦВК лічбамі, не абышлося без інцыдэнтаў, паведамляе “Гарадзенская Вясна”.
Сілавікі ў масках на двух бусах нагналі групу моладзі, якія ўжо пакінулі плошчу, і некалькі чалавек запіхнулі ў свой транспарт. Вядома, што сярод затрыманых ёсць гарадзенскі актывіст, музыка, Ігар Банцар, а таксама Максіміліян Крывец, Артур Купшакоў, Аляксей Павук, Дзяніс Буднік, і Паша Каральчук.
У гэты ж дзень у Гародні былі затрыманая журналістка Hrodna.life Ірына Новік разам мужам Анатолем Новікам, калі яны здымалі мітынг у Гародні ў падтрымку Лукашэнкі.
