Мінюст разгледзіць пытанне аб спыненні ліцэнзіі адваката палітвязняў Бабарыкі і Калеснікавай
Міністэрства юстыцыі Беларусі 15 кастрычніка разгледзіць пытанне аб спыненні ліцэнзіі адваката Аляксандра Пыльчанкі, абаронцы палітычных зняволеных экс-прэтэндэнта на пасаду прэзыдэнта Віктара Бабарыкі і кіраўніцы яго выбарчага штабу, сябра прэзыдыeму Каардынацыйнай рады Марыі Калеснікавай. Пра гэта Аляксандар Пыльчанка распавёў агенцтву «Інтэрфакс-Захад».
Адпаведнае апавяшчэнне ён атрымаў 7 кастрычніка. Пытанне будзе разглядацца 15 кастрычніка на паседжанні кваліфікацыйнай камісіі ў пытаннях адвакацкай дзейнасці пры Міністэрстве юстыцыі.
Як растлумачыў адвакат, «на цяперашні момант сутнасць абвінавачванняў яму дакладна невядомая». 9 кастрычніка ён азнаёміцца з матэрыяламі, якія сталі падставаю для разгляду пытання аб спыненні дзеяння адвакацкай ліцэнзіі.
