“Марфу фактычна трымаюць у закладніцах”. За праваабаронцу “Вясны” паручыліся амаль 200 чалавек Фота
Праваабаронцы “Вясны” у межах кампаніі за вызваленне палітычнай зняволенай і вязніцы сумлення Марфы Рабковай сабралі 190 паручальніцтваў беларусаў і беларусак. У хуткім часе паручальніцтвы з хадайніцтвам аб змяненні меры стрымання Марфы будуць перададзеныя ў Следчы камітэт.
- Валянцін Стэфановіч і Алесь Бяляцкі з паручальніцтвамі за Марфу Рабкову. Фота: spring96.org
Гэтая працэдура прадугледжана артыкулам 121 Крымінальна-працэсуальнага кодэкса Рэспублікі Беларусь. Асабістае паручальніцтва заключаецца ў прыняцці на сябе годнымі даверу асобамі пісьмовага абавязацельства пра тое, што абвінавачаны, знаходзячыся на волі, не схаваецца ад органа крымінальнага пераследу і суда, не будзе перашкаджаць расследаванню справы або разгляду яго судом і не будзе займацца злачыннай дзейнасцю.
Старшыня Праваабарончага цэнтра “Вясна” Алесь Бяляцкі нагадвае, што міжнародная і беларуская праваабарончая супольнасць расцэньваюць пераслед Марфы Рабковай палітычна матываваным і вельмі абураныя тым, што сябра “Вясны” знаходзіцца ў зняволенні.
“Марфу фактычна трымаюць у закладніцах, таму што абвінавачванне абсурднае і зусім не мае ніякага дачынення да яе дзейнасці”, – падкрэсліў Алесь Бяляцкі.
Намеснік старшыні Праваабарончага цэнтра “Вясны”, віцэ-прэзыдэнт Міжнароднай фэдэрацыі за правы чалавека Валянцін Стэфановіч распавёў, што кампанія па зборы паручальніцтваў з’яўляецца часткай вялікай кампаніі ў падтрымку Марфы, якая праводзіцца беларускімі праваабаронцамі з калегамі з міжнародных праваабарончых арганізацый.
“Мы лічым, што трэба выкарыстоўваць усе магчымасці для таго, каб вызваліць Марфу з-пад варты. Таму мы збіралі гэтыя паручальніцтвы і заклікалі ўсіх далучыцца да кампаніі.
Таксама гэта падтрымка самой Марфы і салідарнасць з ёй. Калі людзі падпісваліся за яе, то разумелі, што ў выпадку невыканання ёй умоваў вызвалення з-пад варты, на іх можа быць накладзены вялікі штраф. І пры такіх умовах ўсе згодныя падтрымліваць Марфу.
Праваабаронцы “Вясны” вельмі радыя, што беларусы таксама далучыліся да кампаніі па вызваленню Марфы. Мы вельмі ўдзячныя за гэта.
Мы ў чарговы раз заклікаем беларускія ўлады вызваліць нашу каляжанку. Як мы ўжо неаднаразова адзначалі, у тым ліку ў заяве Рады “Вясны”, пераслед Марфы мы ўспрымаем як пераслед “Вясны” ў цэлым, таму што Марфа з’яўляецца сябрай і праваабаронцай нашай арганізацыі. Мы настойваем і патрабуем неадкладна яе вызваліць”, – сказаў праваабаронца Валянцін Стэфановіч.
- 190 паручальніцтваў за Марфу Рабкову. Фота: spring96.org
Старшыня Праваабарончага цэнтра “Вясна” Алесь Бяляцкі заявіў, што кампанія за вызваленне Марфы Рабковай працягваецца. У бліжэйшы час плануецца судовае абскарджванне меры стрымання Марфы.
Праваабаронцы “Вясны” вельмі ўдзячныя ўсім, хто далучыўся да кампаніі і паручыўся за нашую каляжанку Марфу Рабкову.
Заявы аб неадкладным вызваленні праваабаронцы "Вясны" Марфы Рабковай:
Рукі прэч ад Марфы, рукі прэч ад "Вясны"!
Заява Рады ПЦ “Вясна” ў сувязі з затрыманнем Марфы Рабковай.
Amnesty International: Марфа Рабкова і ўсе палітвязні павінны быць неадкладна вызваленыя
Патрабуем неадкладнага вызвалення палітзняволенай, праваабаронцы ПЦ “Вясна” Марфы Рабковай
Фотафакт. Ніна Багінская паручылася за праваабаронцу "Вясны" Марфу Рабкову
