МЗС: Рашэнне Камітэта па правах чалавека ААН выконваць неабавязкова

Такі адказ атрымаў праваабаронца з Баранавіч  Сяргей Гоўша на свой запыт у Міністэрства замежных спраў РБ. Адказ падпісаны намеснікам міністра МЗС  Алейнікам. Акрамя таго, намеснік міністра  паведаміў, што абарона  правоў грамадзян РБ на ўнутрыдзяржаўным узроўні  ўваходзіць у кампетэнцыю іншых дзяржаўных органаў РБ.  

Сяргей Гоўша прасіў адказаць, чаму не выконваецца рашэнне Камітэта па правах чалавека ад 2007.07.27, чаму дзяржавай парушана і да   гэтага часу не ўзноўлена яго, Гоўшы,   права на свабоду асацыяцый Па словах Гоўшы, згодна закону, калі гэта не тычыцца МЗС, то яны павінны былі толькі ўказаць, да каго звярнуцца. Праваабаронца будзе рыхтаваць новы зварот  у МЗС , каб паведалі, куды іменна звяртацца, каб пытанне вырашылася станоўча.

Праваабаронца Сяргей Гоўша быў адным з заснавальнікаў   скасаванага ўладамі ў 2004 годзе праваабарончага цэнтра “Вясна”. Па рашэнню Камітэта рэспубліцы Беларусь было рэкамендавана аднавіць рэгістрацыю арганізацыі і выплаціць кампенсацыю за незаконнае скасаванне  рэгістрацыі. Камітэт прасіў дзяржаву-удзельніцу апублікаваць ягоныя меркаванні. Ні адно з рашэнняў Камітэта дзяржавай выканана не было.