“Вясна” і FIDH звярнуліся ў Камітэт па катаваннях ААН
Міжнародная федэрацыя правоў чалавека (FIDH) сумесна з Правабарончым цэнтрам “Вясна” падрыхтавалі і накіравалі паведамленне спецрэпарцёру Камітэта па катаваннях і іншых жорсткіх відах абыходжання ААН сп. Манфрэду Новаку, якое тычыцца падзеяў, звязаных з мірнымі акцыямі 9 і 16 верасня ў Менску.
Да паведамлення дададзеныя скаргі пацярпелых ад незаконных і жорсткіх дзеянняў супрацоўнікаў міліцыі, а таксама апытаньні некалькіх непасрэдных сведак катаваньняў.
Праваабаронцы паведамляюць, што на працягу апошніх некалькіх гадоў органы пракуратуры не давалі належнай прававой ацэнкі і адмаўлялі ва ўзбуджэньні крымінальных спраў ў дачыненьні да супрацоўнікаў органаў МУС, якія перавышалі свае паўнамоцтвы ў адносінах да затрыманых удзельнікаў палітычных маніфестацый. Зараз праваабаронцы спадзяюцца, што гэтыя факты не застануцца па-за ўвагай не толькі міжнародных арганізацый, але і органаў пракуратуры Рэспублікі Беларусь
Нагадаем, што ПЦ “Вясна” двойчы рыхтаваў альтэрнатыўныя даклады ў Камітэт па катаваньнях ААН аб выкананьні Рэспублікай Беларусь Канвенцыі супраць катаваньняў і іншых жорсткіх, бесчалавечных ці прыніжаючых годнасьць відаў абыходжаньня і пакараньня.
Кароткае апісаньне падзеяў, якія адбыліся ў Менску 9 і 16 верасня 2009 г.
