Орша: Сфарміраваны ўчасткі для галасавання
Аршанскі гарвыканкам сваім рашэннем № 1456 ад 11.10.2010 зацвердзіў ўчасткі для галасавання па Оршы, Барані, гарадскому пасёлку Балбасава па выбарах Прэзідэнта Рэспублікі Беларусь.
Усяго участкаў у Оршы будзе 62. Гэта на адзін участак больш, чым на папярэдніх выбарах у мясцовыя Саветы дэпутатаў. Дадаўся новы ўчастак на тэрыторыі прадпрыемства «Оршаводоканал», па вул. Магілёўскай, 85, што звязана са з'яўленнем новай забудовы ў гэтай частцы горада. Яшчэ адзін з участкаў пераехаў з Дома культуры ААТ «Легмаш» у размешчаны побач інтэрнат гэтага ж завода. Астатнія ўчасткі размешчаны ў тых жа месцах, што і раней. 6 участкаў зачынены - гэта 4 бальніцы, радзільны дом і дом састарэлых.
Межы шэрагу участкаў зменены ў параўнанні з папярэднімі выбарамі. Многія з участкаў для галасавання размешчаныя на гэты раз на значнай адлегласці ад месца жыхарства выбаршчыкаў. Так, напрыклад, жыхары дома № 33 па вуліцы Міра будуць галасаваць на участку № 1, да якога адлегласць складае каля аднаго кіламетра. Гэта тым больш дзіўна, што ўчасткі № 17, 18 і 19 знаходзяцца зусім побач з гэтым домам (менш чым за 200 метраў).
"Праваабаронцы за свабодныя выбары"
