Гродна: Правабаронцы скардзяцца на рашэнне гарвыканкаму
Праваабаронцы В.Сазонаў і У.Хільмановіч падчас акцыі ў Гародні
Гродзенскія праваабаронцы правялі 19 лістапада супольную нараду, дзе абмяркоўвалася сітуацыя ў горадзе Гродна з выбарчай кампаніяй. У полі разгляду было найперш рашэнне мясцовага гарвыканкаму ад 9 лістапада, якое вызначае месцы для вядзення перадвыбарчай агітацыі. У выніку правабаронцы склалі і накіравалі скаргу ў розныя інстанцыі – ЦВК, Гродзенскую абласную выбарчую камісію і Гродзенскі абласны выканаўчы камітэт.
Праваабаронцы Віктар Сазонаў, Раман Юргель, Уладзімір Хільмановіч і Святлана Рудкоўская лічаць, што рашэнне гарвыканкаму істотна абмяжоўвае і парушае правы і законныя інтарэсы, якія гарантаваныя грамадзянам Канстытуцыяй і выбарчым заканадаўствам.
Заяўнікі скаргаў лічаць, што месцы і памяшканні для сустрэч з выбаршчыкамі вызначаны ў вельмі абмежаванай колькасці, а іх размяшчэнне на тэрыторыі Гродна нязручнае. А менавіта таму, што яны знаходзяцца на значнай адлегласці ад маршрутаў грамадскага транспарту, у месцах, аддаленых ад кампактнага пражывання грамадзянаў. Прыкладам - такія месцы як тэрыторыя Каложскага парку, сквер па вуліцы Леванабярэжнай, а спартыўныя пляцоўкі і школьныя стадыёны ў асенне-зімовы перыяд нязручныя для сустрэчаў з выбаршчыкамі. Прынятае гарвыканкамам рашэнне істотна звужае магчымасці правядзення агітацыйных мерапрыемстваў і парушае права на агітацыю, свабоду атрымання і распаўсюду інфармацыі.
Праваабаронцы патрабуюць перагледзець рашэнне гарвыканкаму ад 9 лістапада і прапаноўваюць дапоўніць пералік месцаў, у якіх можна весці перадвыбарчую агітацыю. У прыватнасці прапаноўваюцца цэнтральныя плошчы і пляцоўкі – Савецкая плошча, плошча Леніна, пляцоўкі каля ўніверсамаў “Брэст”, “Вішнявец”, “Лімож”, кінатэатру “Кастрычнік”, гродзенскага абласнога драмтэатру, гарадскіх рынкаў і іншыя месцы і памяшканні.
“Праваабаронцы за свабодныя выбары”
