Барысаў. Актывісты каманды Саннікава адправілі скаргі ў райвыканкам, ТВК і пракуратуру
Актывіст перадвыбарчай кампаніі кандыдата ў прэзідэнты Андрэя Саннікава Анатоль Аскерка накіраваў скаргі ў Барысаўскі райвыканкам, тэрытарыяльную выбарчую камісію і Барысаўскую раённую пракуратуру з патрабаваннем аднавіць парушаныя правы па правядзенні агітацыйнай кампаніі.
Гэтыя звароты сталі рэакцыяй на тое, што ў Барысаве не ўсюды афармляюцца месцы для размяшчэння нагляднай агітацыі. Анатоль Аскерка ў якасці доказаў невыканання рашэння райвыканкама аб месцах агітацыі пералічвае: універсам «Родная сторона», дзе плакаты спачатку былі размешчаны, а потым знятыя па загаду менскага кіраўніцтва адміністрацыі прадпрыемства, педагагічны каледж, дзе адміністрацыя заявіла, што будзе кансультавацца з ідэалагічным аддзелам райвыканкама і толькі потым размяшчаць агітацыйныя матэрыялы.
Сярод «праштрафіўшыхся» прадпрыемстваў і арганізацый фігуруюць ДВЛГУ «Барысаўскі вопытны лясгас», універсам «Паўночны», гарадскі Палац культуры, СШ № 23, гімназія № 1, ААТ «Поліміз», ААТ «Экран», Барысаўскі завод гуматэхнічных вырабаў, ААТ «Барысаўская швейная фабрыка », Аўтобусны парк № 3. Усе гэтыя ўстановы і прадпрыемствы ўваходзяць у спіс дазволеных месцаў для размяшчэння агітацыйных матэрыялаў, замацаваных рашэннем № 1359 ад 11.11.2010г. Барысаўскага райвыканкама.
У сувязі з гэтым Анатоль Аскерка запатрабаваў ад Барысаўскага райвыканкама, Барысаўскай тэрытарыяльнай выбарчай камісіі прыняць меры па выкананні рашэння райвыканкама і аднавіць парушаныя правы на правядзенне агітацыйнай кампаніі за кандыдата Андрэя Саннікава, а ад Барысаўскай раённай пракуратуры - прыняць меры пракурорскага ўздзеяння з нагоды невыканання рашэння райвыканкама.
"Праваабаронцы за свабодныя выбары"
