Канстытуцыйны суд адмовіўся разглядаць зварот Любові Кавалёвай
Маці асуджанага да смяротнага пакарання Уладзіслава Кавалёва атрымала адказ з Канстытуцыйнага суда на свой зварот ад 1 лютага 2012 года. Любоў Кавалёва звярталася з просьбай вынесці рашэнне аб прызнанні неканстытуцыйным палажэння Крымінальна-выканаўчага кодэкса РБ, якое не прадугледжвае прыпыненне выканання смяротнага пакарання ў сувязі з падачай і рэгістрацыяй індывідуальнага паведамлення ў Камітэт па правах чалавека ААН.
У адказе Канстытуцыйнага суда паведамляецца, што ёсць спецыяльна ўпаўнаважаныя органы, якія маюць права звароту ў Канстытуцыйны суд, і толькі па іх зваротах выносіцца заключэнне аб неканстытуцыйнасці нарматыўна-прававых актаў.
Юрыст-праваабаронца Раман Кісляк не згодзен з такім адказам Канстытуцыйнага суда. Па словах праваабаронцы, Любоў Кавалёва звярталася ў суд з просьбай выносіць не заключэнне, а менавіта рашэнне, і такая практыка існуе. Канстытуцыйны суд па заявах грамадзян прымае рашэнне, дзе даецца ацэнка асобным сферам на прадмет іх суадносінаў з Канстытуцыяй альбо міжнародна-прававымі актамі.
Любоў Кавалёва накіравала лісты наконт звароту ў Канстытуцыны суд Аляксандру Лукашэнку, у Савет Міністраў, Савет Рэспублікі, у Палату Прадстаўнікоў, а таксама ў Вярхоўны суд. Яна просіць унесці ў Канстытуцыйны суд прапанову, каб разгледзець пытанне неадпаведнасці Канстытуцыі і міжнародна-прававым актам палажэння ў Крымінальна-выканаўчым кодэксе, дзе адсутнічае аснова і парадак прыпынення выканання смяротнага пакарання ў сувязі са зваротам у міжнародныя органы расследаванняў і разбіральніцтваў.
