ЦВК: Візуальны падлік колькасці выбаршчыкаў прававога значэння не мае
Старшыня Цэнтрвыбаркаму Лідзія Ярмошына
Назіральнік Сяргей Гоўша звяртаўся ў ЦВК са зваротам, дзе звяртаў увагу, што мелі месца парушэнні пры падліку галасоў выбаршчыкаў на ўчастку для гасавання № 43 у Баранавічах. А менавіта - колькасць выбаршчыкаў (па візуальным падліку) не супадала з колькасцю выдадзеных бюлетэняў.
Старшыня ЦВК Лідзія Ярмошына, спаслаўшыся на арт.55 Выбарчага кодэксу, адзначае, што колькасць выбаршчыкаў, якія атрымалі бюлетэні, устанаўліваецца па спісу выбаршчыкаў, а колькасць выбаршчыкаў, якія прынялі ўдзел у галасаванні, - па бюлетэнях, якія знаходзіліся ў скрынках для галасавання. Візуальны падлік колькасці выбаршчыкаў, які назіральнік праводзіў на ўчастку, прававога значэння не мае, адзначылі ў ЦВК. Паколькі такая працэдура выбарчым заканадаўствам не прадугледжана.
Гоўша таксама скардзіўся на тое, што члены ўчастковай выбарчай камсіі адначасова падлічвалі невыкарыстаныя бюлетэні і бюлетэні, якія знаходзіліся ў скрынцы для датэрміновага галасавання. ЦВК прызнала, што гэта з'яўляецца парушэннем працэдурнага характару, але, па меркаванні Ярмошынай, не магло паўплываць на вынікі выбараў.
Як вынік, Цэнтрвыбаркам не знайшоў падставаў для правядзення праверкі.
"Праваабаронцы за свабодныя выбары"
