Дэпутаты з Германіі, Швейцарыі і Ірландыі ўзялі шэфства над беларускімі палітвязнямі
У межах кампаніі салідарнасці #WeStandBYyou, арганізаванай праваабарончай арганізацыяй Libereco, дэпутаты парламентаў Германіі, Швейцарыі і Ірландыі сталі “хроснымі” беларускіх палітвязняў Вольгі Паўлавай, Уладзіслава Зяневіча, Рамана Гваздзёлкі, Максіма Паўлюшчыка, Руслана Парфёнава, Іллі Паланянкіна, Анастасіі Булыбенка, Таццяны Якельчык і Аляксея Санчука.
Фрэнсіс Фіцджэральд, дэпутатка Еўрапарламента, былая віцэ-прэм'ер-міністарка Ірландыі і сябра камітэта Еўрапейскага парламента па правах жанчын, стала “хроснай” Вольгі Паўлавай.
- Фрэнсіс Фіцджэральд, дэпутатка Еўрапарламента, былая віцэ-прэм'ер-міністарка Ірландыі і сябра камітэта Еўрапейскага парламента па правах жанчын
Яна сказала:
“Я разам з народам Беларусі і заклікаю да вызвалення незаконна затрыманых зняволеных, уключаючы мужную Вольгу Паўлаву, якой я буду апекавацца. Вольга Паўлава — маладая жанчына, якая павінна мець тыя ж свабоды і правы, што і ўсе жанчыны ва ўсёй Еўропе ў нашыя дні.”
Дэпутатка Швейцарскай нацыянальнай рады Саміра Марці падтрымала Уладзіслава Зяневіча.
- Дэпутатка Швейцарскай нацыянальнай рады Саміра Марці
Яна заявіла:
“З 30 лістапада ён знаходзіцца ў палітычна зняволенні за мірны супраціў незаконнаму рэжыму дыктатара Лукашэнкі. Як “хросная” Уладзіслава Зяневіча і дэпутатка ад Сацыял-дэмакратычнай партыі, я выступаю за тое, каб яго і ўсіх палітвязняў у Беларусі неадкладна вызвалілі, каб Лукашэнка сышоў з пасады і правёў новыя і хуткія выбары. Мы салідарныя з народам Беларусі!”
Дэпутат Бундэстага Германіі Ральф Капчак стаў “хросным” для Рамана Гваздзёлкі.
- Дэпутат Бундэстага Германіі Ральф Капчак
З гэтай нагоды спадар Капчак заявіў:
“Пратэсты ў Беларусі працягваюцца: супраць кіраўніка Лукашэнкі і за свабодныя выбары. Справаздача Amnesty International яшчэ раз паказвае жорсткасць, з якой рэжым дзейнічае супраць мірных акцый пратэсту. Шмат хто з дэманстрантаў трапляе ў турму. Я стаў “хросным” аднаго з іх, Рамана Гваздзёлкі. Ужо некалькі месяцаў ён сядзіць у турме, і ў гэтыя выхадныя яму споўніцца 26 гадоў”.
- Бары Уорд, дэпутат Сената Ірландыі
Бары Уорд, дэпутат Сената Ірландыі, стаў “хросным” Максіма Паўлюшчыка і заявіў:
“Я разам з Беларуссю, і заклікаю вызваліць Максіма Паўлюшчыка, які быў зняволены за надпіс “Не забудзем” побач з месцам, дзе беларускія праваахоўнікі забілі мірнага пратэстоўца Аляксандра Тарайкоўскага.”
Дэпутатка Еўрапарламента Сабіна Верхеен будзе “хроснай” Руслана Парфёнава.
- Дэпутатка Еўрапарламента Сабіна Верхеен
Яна заявіла:
“Думкамі я з Русланам Парфёнавым, які быў незаконна арыштаваны ў жніўні. Ён паспяхова працаваў у межах перадвыбарчай кампаніі Святланы Ціханоўскай. З самага пачатку ён знаходзіўся на перадавой у барацьбе за дэмакратыю. Нягледзячы на тое, што ён ведаў пра магчымую небяспеку для сябе, ён адстойваў свае перакананні ў тым, што ёсць правільным”.
Дэпутатка Бундэстага Даніэла Клюкерт узяла “шэфства” над Іллём Паланянкіным.
- Дэпутатка Бундэстага Даніэла Клюкерт
З гэтай нагоды спадарыня Клюкерт заявіла:
“Тое, што мы бачылі і працягваем бачыць у Беларусі, мяне шакіруе. Такія відавочныя фальсіфікацыі выбараў, рэпрэсіі супраць уласнага народа і жорсткі гвалт супраць мірных дэманстрантаў — усё гэта недапушчальна. Той факт, што грамадзяне Беларусі не запалоханыя, нягледзячы на ўсе пагрозы і гвалтоўныя напады, паказвае, наколькі вялікая воля людзей пакласці канец гэтаму аўтарытарнаму рэжыму. Я выказваю сваю павагу кожнаму з іх за мужнасць, неабходную для таго, каб выказваць сваю пазіцыю або ўдзельнічаць у вулічных пратэстах, нягледзячы на ўсе гэтыя небяспекі. Ілля Паланянкін зрабіў менавіта гэта: ён мірна выступаў супраць прыгнятальнага рэжыму і быў затрыманы за гэта. Ужо больш за чатыры месяцы ён знаходзіцца ў незаконным зняволенні. Гэта павінна скончыцца! Я патрабую не толькі яго неадкладнага вызвалення, але і вызвалення кожнага мірнага дэманстранта”.
- Карына Конрад, дэпутатка Бундэстага і намесніца старшыні нямецка-беларускай парламенцкай групы
Карына Конрад, дэпутатка Бундэстага і намесніца старшыні нямецка-беларускай парламенцкай групы, стала “хроснай” Анастасіі Булыбенка і заявіла:
“Мы рашуча падтрымліваем народ Беларусі, які мірна змагаецца за дэмакратыю, вяршэнства закона, правы чалавека, свабода і свабодныя выбары. Яны заслугоўваюць салідарнасці, прызнання і падтрымкі ад нашага парламента. Мы заклікаем да неадкладнага спынення гвалту, вызвалення ўсіх палітычных зняволеных, правядзення свабодных і справядлівых новых выбараў пад міжнародным назіраннем і сур'ёзнага і ўсёабдымнага працэсу канстытуцыйнай рэформы. Думкамі я разам з затрыманай студэнткай Анастасіяй Булыбенка, якая, як і многія іншыя, стала нявіннай ахвярай рэпрэсій і гвалту. Затрыманні і прымусовыя адлічэнні студэнтаў, якія ўдзельнічаюць у мірных акцыях пратэсту, недапушчальныя і павінны быць неадкладна адменены”.
Ніл Рычманд, дэпутат Дойл Эрэн, ніжняй палаты парламента Ірландыі, стаў “хросным” Таццяны Якельчык.
- Ніл Рычманд, дэпутат Дойл Эрэн, ніжняй палаты парламента Ірландыі
Ён заявіў:
“Я разам з прыгнечаным народам Беларусі. З гэтай мэтай я заклікаю вызваліць незаконна затрыманых зняволеных у Беларусі, у прыватнасці, Таццяну Якельчык, якой я буду апекавацца”.
Дэніс Нотэн, яшчэ адзін дэпутат парламента Ірландыі, падтрымаў Аляксея Санчука.
- Дэніс Нотэн, дэпутат ніжняй палаты парламента Ірландыі
Ён заявіў:
“Тое, што мы назіраем у Беларусі, цалкам непрымальна, і, нягледзячы на міжнародны ціск, пераслед і затрыманні мірных дэманстрантаў не спыняюцца. Як дэпутат ірландскага парламента, я хачу адназначна асудзіць абсалютна непрымальную сітуацыю з правамі чалавека ў Беларусі. Усе беларусы павінны мець магчымасць удзельнічаць у мірных акцыях пратэсту, не баючыся за ўласную бяспеку альбо пагрозу затрымання. Цяперашнія рэпрэсіі над беларускім народам павінны спыніцца, і ў падтрымку гэтай мэты я рады падтрымаць кампанію па вызваленні Аляксея Санчука.”
