Затрыманні і новыя крыміналкі: хроніка пераследу 28 ліпеня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 28 ліпеня збірае апошнія факты палітычнага пераследу грамадзян Беларусі.
|
Калі вас ці вашых блізкіх затрымалі, паведамляйце нам:
|
У Гродне прама пасярод вуліцы затрымалі мінчука, які адбывае пакаранне ў гродзенскай ПУАТ № 24
- Святаслаў Лепешаў. Фота: spring96.org
Раней яго асудзілі па ч. 1 арт. 130 КК "распальванне расавай, нацыянальнай, рэлігійнай альбо іншай сацыяльнай варожасці або варажнечы" і арт. 186 КК "пагроза забойствам, прычыненнем цяжкіх цялесных пашкоджанняў або знішчэннем маёмасці". Верагодна, гутарка ідзе пра 49-гадовага мінчука Святаслава Лепешава. Мінскі гарадскі суд 12 жніўня асудзіў яго да чатырох гадоў "хіміі" за пагрозу забойствам расійскаму прапагандысту Канстанціну Прыдыбайлу з RT (арт. 186 КК) і распальванне нацыянальнай варожасці ў адносінах да рускіх (арт. 130 КК).
Згодна матэрыялам з праўладных тэлеграм-каналаў, знаходзячыся на" хіміі", мужчына распаўсюдзіў у Facebook экстрэмісцкія матэрыялы. На "пакаяльным відэа" ён прызнаў віну ў гэтым і раскаяўся.
Супраць сябра АГП распачалі крымінальную справу
Праваабаронцам стала вядома, што пасля 15 сутак арышту на волю не выйшаў 29-гадовы сябра Аб'яднанай грамадзянскай партыі Артур Смалякоў.
Яму інкрымінаваны арт. 342 Крымінальнага кодэкса (актыўны удзел у групавых дзеяннях, якія груба парушаюць грамадскі парадак).
Затрыманні ў Мінску
Праваабаронцам паведамілі пра затрыманне ў Мінску мужа і жонкі Асінскага Яўгена і Ганны (увечары вызвалілі). Затрымлівалі супрацоўнікі ГУБАЗіКа: выламалі дзверы, у кватэры правялі ператрус, пагражалі. Таксама затрыманы сын Ганны Віталь Міхайлоўскі. Яго арыштавалі на 14 сутак.
У Беларусі пачалі блакаваць сацсетку LinkedIn
У адным з правайдараў @devby пацвердзілі, што LinkedIn заблакаваны па рашэнні Міністэрства інфармацыі Беларусі.
LinkedIn — сацсетка, у якой шукаюць працу (асабліва ў сферы IT), а таксама ўсталёўваюць бізнес-кантакты.
«Што з ім і ў якім стане — адвакат не ведае». Мікалай Аўтуховіч, які васямнаццаць дзён трымае «сухую галадоўку», адсутнічаў на сённяшнім пасяджэнні
- Мікалай Аўтуховіч на судзе 18 траўня
«Адвакат сказала, што таты не было сёння на судзе. Яна выступіла з хадайніцтвам, каб яго вярнулі на пасяджэнне. Суд сказаў, што з-за сістэматычных парушэнняў не будзе яго вяртаць яго ў залу суда.
Што з ім і ў якім тата стане — адвакат не ведае. У яго ёсць інфармацыя, што ўчора былі нейкія рухі наконт хуткай — але не вядома яна выклікалася для таты ці для кагосьці іншага. Чакаем навін ад адваката яшчэ ўвечары», — паведаміла ягоная дачка.
Адвакатка Мікалая Аўтуховіча не змагла даведацца пра стан здароўя вязня.
«Пасяджэнне скончылася каля 18:00. Адвакату не ўдалося даведацца пра стан здароўя бацькі. Начальнікаў турмы і медчасткі ўжо не было на працоўных месцах», — паведаміла ягоная дачка.
Нагадаем, Мікалай Аўтуховіч 18-ты дзень трымае «сухую галадоўку». Сёння на судовым пасяджэнні яго не было — родныя і адвакат не ведаюць што з ім і ў якім ён стане.
Падтрымаць Мікалая пасылкамі і лістамі салідарнасці: Турма №1, 230023, Гродна, Кірава, 1, Аўтуховічу Мікалаю Мікалаевічу
ГУБАЗіК затрымаў 17-гадовага хлопца за «распальванне варожасці» — ён напісаў, што беларусы заўсёды ваявалі з Расіяй
Праўладныя тэлеграм-каналы паведамляюць пра затрыманне аўтара газеты «Прэсбол» Рамана Качыны. Хлопец у гэтым годзе скончыў школу і збіраўся паступаць на журфак. Сілавікі сцвярджаюць, што ў 2020-м годзе Раман удзельнічаў у акцыях пратэсту, а таксама «распальваў варожасць у адносінах да жыхароў Расійскай Федэрацыі» — як кажа сам хлопец на «пакаяльным відэа», ён пісаў, што беларусы заўсёды ваявалі з Расіяй.
КДБ унёс у «спіс тэрарыстаў» яшчэ двух чалавек
У спіс дададзены Станіслаў Кузміцкі (жыхар Мінска, абвінавачваеца паводле арт. 130 КК, арт. 290-4 КК, арт. 293 КК і арт. 361 КК) і палітзняволены экс-пракурор Яўген Бабак.
Яўген вядомы вядомы тым, што ў жніўні 2020-га ініцыяваў праверку людзей у форме ДАІ, якія збівалі байкераў ноччу 11 жніўня. Праверка ні да чаго не прывяла, а сам Бабак звольніўся. Яго затрымалі ў чэрвені 2021 года і пазней абвінавацілі паводле арт. 342 КК («актыўны удзел у групавых дзеяннях, якія груба парушаюць грамадскі парадак») і ч.1 арт. 130 КК («распальванне варожасці»). 12 траўня экс-пракурору прысудзілі чатыры гады калоніі.
Цяпер у «тэрарыстычным» спісе КДБ 890 чалавек, 149 з якіх — беларусы.
У Баранавічах затрымалі сябру ініцыятыўнай групы Ціханоўскай
- Тамара Патоцкая
Стала вядома, што ўчора ў міліцыю выклікалі лідарку Баранавіцкай суполкі Беларускай сацыял-дэмакратычнай партыі (Народная Грамада), сябру ініцыятыўнай групы Ціханоўскай Тамару Патоцкую. Паведамляецца, што з міліцыя яе не выпусцілі.
Стала вядома, што сёння ў міліцыю выклікаюць яе сына.
Пастара з Гомеля Дзмітрыя Падлобка будуць судзіць па артыкуле аб «несанкцыянаваным мерапрыемстве» за здзейсненае без дазволу таемства хрышчэння
Сёння яго выклікалі ў міліцыю, каб скласці адміністрацыйны пратакол.
Маці палітвязня Ягора Дуднікава просіць улады Расіі забраць сына з турмы ў Беларусі
- Ягор Дуднікаў. Фота з сямейнага архіва
Юлія Дуднікава ў лістах у мінюст Расіі і амбасаду Расіі ў Мінску просіць забраць сына з турмы Беларусі ў расійскую калонію.
Яна скардзіцца, што не можа атрымаць спаткання з Ягорам, бо жыве разам з малодшым сынам у Расіі. Дуднікава просіць расійскі мінюст скарыстацца дамовай паміж Беларуссю і Расіяй, якае дае магчымасць перадаваць асуджаных для далейшага адбывання пакарання ў краіну, грамадзянамі якой яны з'яўляюцца, паведамляе BBC.
Нагадаем, грамадзяніну РФ Ягору Дуднікаву прысудзілі 11 гадоў калоніі. Яго адправілі адбываць пакаранне ў бабруйскую ПК-2, аднак у чэрвені 2022 года мясцовы суд вырашыў змяніць Ягору рэжым з узмоцненага на турэмны на тры гады.
Падтрымайце Ягора: Турма № 4, 212011, Магілёў, Крупскай, 99А, Ягору Аляксандравічу Дуднікаву
Інфармацыя дапаўняецца.
