"Абразіў Лукашэнку і распальваў варожасць у Telegram-чаце": трэнера з Нясвіжчыны асудзілі да 2 гадоў калоніі
У Мінскім абласным судзе 21 ліпеня да двух гадоў калоніі ва ўмовах агульнага рэжыма асудзілі 37-гадовага спартыўнага трэнера па армрэстлінгу з аграгарадка Сноў Несвіжскага раёна Аляксея Грыцкевіча. Яго абвінавацілі ў абразе Лукашэнкі і "распальванні сацыяльнай варожасці" ў Telegram-чаце. Прысуд вынесла суддзя Алена Міснік.
- Аляксей Грыцкевіч. Фота з сацсетак
Згодна версіі абвінавачвання, у лютым 2022 года з мабільнага тэлефона Аляксей Грыцкевіч «падрыхтаваў і размясціў у дэструктыўным Telegram-чаце паведамленні, у якіх публічна абразіў кіраўніка дзяржавы». Ён жа ў сакавіку 2022 года ў Telegram-чаце апублікаваў відэапаведамленне, у якім заклікаў да гвалтоўных дзеянняў у дачыненні да групы асоб, аб'яднаных па прыкметах нацыянальнай і сацыяльнай прыналежнасці.
Вядома, што Аляксея затрымалі 6 сакавіка — супрацоўнікі САХРа выламалі дзверы ў кватэру. 28 чэрвеня — месяц таму — КДБ унёс Грыцкевіча ў спіс асобаў, датычных да тэрарыстычнай дзейнасці.
На судзе Аляксей віну не прызнаў.
У выніку пракуратура Мінскай вобласці на падставе ч. 1 арт. 368 і ч. 1 арт. 130 Крымінальнага кодэкса запрасіла пакаранне ў выглядзе пазбаўлення волі на тэрмін два гады з адбываннем у папраўчай калоніі ва ўмовах агульнага рэжыму. Менавіта такі прысуд вынесла суддзя Алена Міснік.
