Выстава "Пачуцці: Малюнкі палітвязняў Беларусі" адкрыецца ў Варшаве ў Дзень правоў чалавека
Праваабарончы цэнтр "Вясна" запрашае 10 снежня на адкрыццё выставы "Пачуцці" ў Варшаве, дзе будзе прадстаўлена калекцыя малюнкаў, створаных палітычнымі вязнямі Беларусі ва ўмовах турэмнага зняволення. Падчас мерапрыемства адбудзецца прэзентацыя музычнага альбома "Пазначаныя жоўтым".
Кожны штрых, кожная лінія на паперы — гэта не проста мастацкае выказванне, але і сведчанне глыбокіх перажыванняў і спроба захаваць сваё "я" ў суровых абставінах. Гэтыя працы — крык душы, зашыфраваны ў малюнках, вобразах і колерах, які адлюстроўвае прагу свабоды, любові да блізкіх і стойкасць перад несправядлівасцю.
Экспазіцыя ўздымае складаныя і важныя пытанні чалавечай годнасці, грамадзянскай адказнасці і сілы творчасці. Малюнкі — гэта і спроба знайсці святло нават ва ўмовах поўнай ізаляцыі, не страціць сувязь са знешнім светам і данесці да грамадства пачуцці, якія немагчыма перадаць словамі.
Ключавыя элементы экспазіцыі
Малюнкі ў лістах
Простыя матэрыялы — папера, аловак, ручка, фламастэр — сталі для зняволеных адным са сродкаў камунікацыі і творчасці.
Пасланні родным
Асабістыя гісторыі, вытрымкі з лістоў, якія выказваюць сум, надзею і падтрымку блізкім.
Сімвалізм у творчасці
Часта выявы напоўненыя метафарамі, алегорыямі і ўтоенымі сэнсамі, якія патрабуюць удумлівага аналізу.
На выставе будзе прадстаўлена невялікая частка малюнкаў, беражліва захаваных людзьмі і праваабаронцамі. У цяперашні час палітычным зняволеным забараняюць адпраўляць малюнкі з месцаў зняволення, а многія працы спецыяльна знішчаюцца супрацоўнікамі турмаў.
Чаму гэта важна?
Выстава заклікана прыцягнуць увагу грамадства да лёсаў людзей, якія апынуліся ў зняволенні за свае перакананні. Яна дапамагае ўбачыць турму не праз шэраг загалоўкаў навінаў, а праз прызму асабістых гісторый і творчага самавыяўлення.
Даты і месца правядзення
Выстава пройдзе з 10 па 15 снежня 2024 г. у Музеі Вольнай Беларусі (ul. Foksal 11, Warszawa).
Урачыстае адкрыццё: 10 снежня ў 19.00, уваход вольны.
Падчас адкрыцця адбудзецца прэзентацыя альбома “Пазначаныя жоўтым” і сустрэча з яго стваральнікамі і стваральніцамі.
Мерапрыемства ў Фэйсбуку
Запрашаем усіх жадаючых наведаць экспазіцыю і падумаць пра каштоўнасці свабоды, справядлівасці і чалавечнасці, натхніцца на падтрымку тых, хто пазбаўлены голасу, але працягвае сваю барацьбу нават у нечалавечых умовах зняволення.
"Вясна" ўдзячная Музею Вольнай Беларусі за прадастаўленне пляцоўкі і супрацу.
