23 сьнежня ў Менскім раённым судзе пачынаецца крымінальны працэс над Міхаілам Марынічам
Алег Грузьдзіловіч, Менск Былога міністра, амбасадара Міхаіла Марыніча шмат хто ў Беларусі лічыць вязьнем сумленьня. У судзе Міхаіла Марыніча чакае лава падсудных, звышпільныя ахоўнікі, строгія судзьдзі, а зь іншага боку – сваякі і яшчэ шмат тых, хто прыйдзе яго падтрымаць.
Якім будзе гэты першы ў Беларусі працэс над амбасадарам? (Паводле закону, хоць спадар Марыніч і быў адкліканы з пасады пасла ў Латвіі, ён пажыцьцёва лічыцца амбасадарам.) Нагадаю, Міхаіла Марыніча абвінавачваюць у захоўваньні пісталета без адпаведнага дазволу ды ў крадзяжы кампутараў няўрадавай арганізацыі “Беларуская асацыяцыя “Дзелавая ініцыятыва”. Яму пагражае да 8 гадоў турмы. Між тым вінаватым ён сябе не прызнае і тлумачыць перасьлед палітычнымі прычынамі – найперш помстай уладаў за сыход у апазыцыю ды спробай ня даць яму вылучыцца кандыдатам на прэзыдэнты на будучых прэзыдэнцкіх выбарах.
Напярэдадні я папрасіў сына амбасадара Ігара Марыніча пракамэнтаваць абвінавачваньні, якія выстаўленыя супраць ягонага бацькі. Вось што патлумачыў Ігар Марыніч адносна пісталета, які нібыта быў знойдзены на бацькавым лецішчы:
(Ігар Марыніч: ) “Зафіксаваны факт узлому. Ёсьць сьведкі таго, што там усё было перавернута і менавіта ў тым пакоі, дзе разьбілі шкло, знайшлі гэты пісталет. У поліэтыленавым пакунку, без адбіткаў пальцаў, са сьпілаванымі нумарамі”.
Паводле зьвестак, пісталет, які знайшлі ў старэйшага Марыніча – вельмі рэдкі, такой зброяй карыстаюцца супрацоўнікі адмысловых службаў у Эўропе. Сваякі Міхаіла Марыніча мяркуюць, што суд зацікавіцца вэрсіяй сьледзтва пра тое, адкуль яго нібыта здабыў Міхаіл Марыніч.
Ігар Марыніч перакананы, што і эпізод з кампутарамі таксама не падмацаваны доказамі віны ягонага бацькі.
(Марыніч: ) “Пра тое, дзе знаходзяцца гэтыя кампутары, ведалі супрацоўнікі “Дзелавой ініцыятывы”. Яны тэлефанавалі майму бацьку і прасілі куды-небудзь іх вывезьці, бо іх выганялі з офісу”.
Нагадаю, сьледзтва лічыць, што кампутары няўрадавай арганізацыі “Беларуская асацыяцыя “Дзелавая ініцыятыва” скраў Міхаіл Марыніч. Падставай для такога меркаваньня ёсьць тое, што гэтыя кампутары знайшлі ў ягоным гаражы.
Колькі працягнецца гэты працэс і якім будзе ягоны вынік? Ігар Марыніч лічыць, што ўлады адмыслова распачынаюць працэс напярэдадні калядных і навагодніх сьвятаў, каб цікаўнасьць да яго зьменшылася. Паводле сыноў Марыніча, ўлады разьлічваюць правесьці суд як мага хутчэй і прызнаць Міхаіла Марыніча вінаватым хаця б паводле аднаго з абвінавачваньняў, каб пашкодзіць яму вылучацца кандыдатам на прэзыдэнты ў 2006 годзе, мяркуе Ігар Марыніч. Ён, аднак, спадзяецца, што грамадзкая падтрымка і сумленьне судзьдзяў могуць зьмяніць гэты сцэнар. Адвакаты Марыніча перакананыя, што адзіным законным вынікам працэсу мусіць стаць апраўданьне абвінавачанага.
(Паводле радыё "Свабода")
