Генадзь Бураўкін – у падтрымку “Нашай Вясны”

Генадзь Бураўкін, лаўрэат дзяржаўных прэмій, паэт, перакладчык, публіцыст, выказаў сваё меркаваньне наконт сітуацыі вакол праваабарончага аб’яднаньня “Наша Вясна”, дакументы для рэгістрацыі якога былі пададзеныя ў Мінюст 26 студзеня 2009 года.

Правабаронцы існуюць у любой дзяржаве і ў любым грамадстве. У тым ліку і ў Беларусі. Хаця з  аднаго боку дзяржава павінна найперш сама клапаціцца згодна з Канстытуцыяй аб захаваньні асноўных правоў людзей, аберагаць іх свабоды, але яна ж мусіць запытвацца ў чыноўнікаў аб тым, як яны выконваюць свае абавязкі па захаваньні правоў чалавека.

З іншага боку, калі да гэтай працы далучаецца і само грамадства, альбо яго частка ў выглядзе праваабарончых арганізацый,  якія назіраюць за захаваньнем правоў чалавека, указваюць на недахопы, нешта могуць парэкамендаваць чыноўнікам – дык  гэта толькі на карысьць агульнай справе.

Правабарончы цэнтр “Вясна” у свой час заваяваў аўтарытэт не толькі ў Беларусі, але і за яе межамі, людзі маюць багаты вопыт працы, таму  магчымасць для праваабаронцаў адкрыта дзейнічаць ў грамадстве можа толькі надаць дзяржаве міжнароднага прэстыжу, – адзначыў Генадзь Бураўкін.