Абарона правоў дзяцей: нацыянальны і міжнародны вопыт

29.05.2009 Тэгі: грамадства
Крыніца: Нацыянальная Бібліятэка Беларусі

https://spring96.org./be/news/30426 2009 2009-05-29T13:35:00+0300 2009-05-29T13:35:00+0300 1970-01-01T03:00:00+0300 be https://spring96.org./files/images/sources/dzeci_pravy.jpg

Фота Андрэя Лянкевіча

З 1 чэрвеня па 5 ліпеня ў аддзеле абслугоўвання афіцыйнымі дакументамі (2-гі паверх, пам. 207) адкрыта тэматычная кніжная выстаўка “Абарона правоў дзяцей: нацыянальны і міжнародны вопыт”, паведамляе Нацыянальная бібліятэка Беларусі.

Гэты Дзень, які штогод адзначаецца 1 чэрвеня амаль ва ўсіх краінах свету, – адно з найстарэйшых міжнародных святаў. Рашэнне аб яго правядзенні было прынята Міжнароднай дэмакратычнай федэрацыяй жанчын на спецыяльнай сесіі ў лістападзе 1949 года.

Дзеці складаюць прыкладна 20–25% насельніцтва ў кожнай краіне. На жаль, у многіх з іх яны знаходзяцца ў небяспечным становішчы і маюць патрэбу ў абароне. Па даных апытання, праведзенага Дзіцячым фондам ААН (ЮНІСЕФ), больш за палову дзяцей жывуць у сем’ях, дзе фізічны і псіхалагічны гвалт – звычайная справа, а кожнае дзесятае дзіця рэгулярна становіцца ахвярай агрэсіўных паводзін дарослых. З 1996 года каля 2 мільёнаў дзяцей загінулі ў выніку ваенных дзеянняў, 6 мільёнаў былі паранены і скалечаны, 12 мільёнаў дзяцей сталі бяздомнымі ў зонах канфліктаў. Больш за 20 мільёнаў дзяцей былі вымушаны пакінуць свае дамы і разам з сем’ямі перайсці на становішча бежанцаў.

Міжнародны дзень абароны дзяцей – гэта дзень мабілізацыі сусветнай грамадскасці на абарону дзяцей ад пагрозы вайны, барацьбу за захаванне іх жыцця і здароўя, за ажыццяўленне выхавання і адукацыі на дэмакратычнай аснове. Гэта не толькі адно з самых радасных святаў для дзятвы, але і напамінак дарослым пра неабходнасць захоўваць і паважаць правы дзіцяці як неабходную ўмову для фарміравання гуманнага, справядлівага і паспяховага грамадства.

ААН падтрымала ініцыятыву правядзення гэтага свята і аб’явіла абарону правоў, жыцця і здароўя дзяцей адным з прыярытэтных кірункаў сваёй дзейнасці. У 1959 годзе Генеральная Асамблея ААН прыняла Дэкларацыю правоў дзіцяці, а ў 1989 годзе – Канвенцыю аб правах дзіцяці, у якіх гучыць заклік да бацькоў, дзяржаўных органаў, мясцовых уладаў і ўрадаў, недзяржаўных арганізацый прызнаць выкладзеныя ў іх правы дзяцей і імкнуцца да іх выканання.

У Рэспубліцы Беларусь Міжнародны дзень абароны дзяцей адзначаюць прыкладна 1 млн 867 тыс. 570 дзяцей. Іх правы і законныя інтарэсы зацверджаны ў многіх нацыянальных дакументах. Асноўнымі нарматыўнымі прававымі актамі нашай краіны ў дадзенай сферы з’яўляюцца Канстытуцыя Рэспублікі Беларусь, Кодэкс Рэспублікі Беларусь аб шлюбе і сям’і, Закон Рэспублікі Беларусь “Аб правах дзіцяці”. Канкрэтныя меры па паляпшэнні становішча дзяцей рэалізуюцца ў рамках прэзідэнцкай праграмы “Дзеці Беларусі” на 2006–2010 гады. Вялікае значэнне мае “Нацыянальны план дзеянняў па паляпшэнні становішча дзяцей і ахове іх правоў на 2004–2010 гады”. З гэтымі дакументамі можна пазнаёміцца на прапанаванай выстаўцы.

У экспазіцыі таксама прадстаўлена больш за 100 дакументаў міжнародных арганізацый (ААН, ЮНЕСКА, Савета Еўропы, Еўрапейскага саюза і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты.

Выстаўка складаецца з наступных раздзелаў:

нацыянальныя і міжнародныя прававыя дакументы па абароне правоў дзіцяці;
абарона правоў і інтарэсаў дзяцей у Рэспубліцы Беларусь;
садзейнічанне здароваму ладу жыцця дзяцей;
забеспячэнне акаснай адукацыі для кожнага дзіцяці;
абарона дзяцей ад жорсткіх адносін, эксплуатацыі і гвалту.

Выстаўка прызначана для педагогаў, юрыстаў, сацыёлагаў, работнікаў сферы адукацыі, аховы здароўя, культуры, а таксама для ўсіх, хто неабыякавы да будучыні нашых дзяцей.

Спасылкі на інтэрнэт-рэсурсы

ЮНІСЕФ