Сяргея Серабро дапыталі пра Сяргея Рыжова
Рэдактара незалежнага сайту «Народныя навіны Віцебска» і стваральніка «Вольнага форуму вольнага гораду» дапыталі ў віцебскім дэпартаменце папярэдніх расследванняў пра заклік да агульнабеларускага страйку — яго размясціў на форуме былы прэтэндэнт на ўдзел у прэзідэнцкіх выбарах Сяргей Рыжоў.
Як распавёў Сяргей Серабро, следчыя праводзяць праверку акалічнасцяў з’яўлення закліку распачаць 3 ліпеня агульнабеларускі бестэрміновы страйк. Пытанні да стваральніка форуму тычыліся тэхнічнага боку: у прыватнасці, ці мадэруюцца допісы і ці можа Спадар Серабро быць пэўны, што заклік да страйку размясціў менавіта Сяргей Рыжоў.
— Падпісацца прозвішчам Рыжоў, у прынцыпе, мог хто заўгодна. Тая гэта асоба ці не тая, я высвятдляць не стаў, бо форум ствараўся для таго, каб любы карыстальнік мог размясціць на ім нейкую тэму для грамадскага абмеркавання. Допісы «фарумчан» мадэруюцца, але толькі пасля размяшчэння на сайце — выдаляюцца нецэнзурныя выразы, але агульны змест не рэдагуецца, — патлумачыў Сяргей Серабро.
Са спадаром Рыжовым яны асабіста не знаёмыя, допіс з заклікам да страйку Сяргей Серабро ўбачыў толькі ў інтэрнэце.
Сяргея Рыжкова на гутарку ў дэпартамент папярэдніх расследванняў выклікаюць 29 чэрвеня да 10 гадзінаў.
