Памёр Васіль Быкаў.
22-га чэрвеня ў рэанімацыйным аддзяленні анкалагічнага шпіталю ў Бараўлянах, што пад Мінскам, памёр народны пісьменнік Беларусі Васіль Быкаў. Ён быў гонарам нашай нацыі, жывым класікам сусветнай літаратуры. З сярэдзіны 90-х супраць Васіля Быкава за яго незалежніцкую дзейнасць была ўзнятая хваля цкавання ў дзяржаўных СМІ; дзяржаўныя друкарні адмаўляліся выпускаць яго новыя кнігі. Некалькі апошніх гадоў В. Быкаў быў вымушаны правесці за мяжой: спачатку па запрашэнні міжнароднага ПЭН-цэнтра жыў у Фінляндыі і Нямеччыне, а затым пераехаў у Чэхію, дзе ўвесну г.г. перанёс аперацыю па выдаленні ракавай пухліны страўніка.
Свой 79-й дзень нараджэння 19-га чэрвеня 2003 г. В. Быкаў сустрэў на радзіме. Ён праходзіў курс рэабілітацыі ў адной з мінскіх клінік і сустракаўся толькі з абмежаваным колам сяброў.
