Дэпутат Юркевіч праблему рабочых “Бярозабуду” не вырашыў
Аляксандр Юркевіч, дэпутат Палаты прадстаўнікоў ад Бярозы, усё ж наведаў ліквідуемае прадпрыемства “Бярозабуд”. Але, па словах рабочых, сустрэча не спраўдзіла іх чаканняў. Дыскусіі не атрымалася, бо дэпутат адразу папярэдзіў: “Што зроблена, то зроблена, вінаватых шукаць не будзем. А людзям знойдзем месца, маўляў, цяпер ён будзе сачыць за гэтым.” Рабочыя не пагадзілася. Яны лічаць развал патрэбнага для людзей і для гаспадаркі дзяржавы прадпрыемства шкодным і недальнабачным крокам кіраўніцтва Бярозаўскага раёна ў першую чаргу і няздольнасцю кіраўніцтва прадпрыемства. Таму яны сказалі дэпутату, што за развал нехта павінен адказаць. Але на гэтым дыскусія абарвалася.
Частка работнікаў ужо сышла з прадпрыемства, яны самі знайшлі сабе месцы. А частка вырашыла трымацца да апошняга.
Нагадаем, што на пачатку лістапада 2012 года рабочыя прадпрыемства “Бярозабуд” звярнуліся з лістом да дэпутата Юркевіча. Яны прасілі яго прыехаць да іх на сустрэчу, каб абмеркаваць захады па захаванню прадпрыемства. Спачатку дэпутат праігнараваў запрашэнне, абмежаваўся толькі пісьмовым адказам, але пазней усё ж з рабочымі сустрэўся.
