Віцебскія актывісты добраўпарадкавалі самаробны мемарыял (фота)
Сябры Партыі БНФ сабраліся на ўзлеску каля вёскі Паляі Віцебскага раёну. Тут у 1930-50 гады адбываліся сталінскія расстрэлы мірных грамадзянаў. Мясцовыя ўлады адмаўляюцца паставіць у гэтых мясцінах памятны знак, хаця пра трагічныя падзеі многія тутэйшыя жыхары яшчэ памятаюць і могуць іх засведчыць.
Самаробны мемарыял пад вёскай Паляі пачаў стварацца яшчэ 1990-х гадах – тады з'явіліся першыя мемарыяльныя крыжы ў гэтых мясцінах. Некалькі разоў невядомыя вандалы іх нішчылі, але потым з'яўляліся новыя крыжы – і драўляныя, і жалезныя… На самым высокім з іх ёсць надпіс "Ахвярам таталітарнага рэжыму".
Актывісты збіралі аповяды мясцовых жыхароў, якія распавядалі, што тут расстрэльвалі мірных людзей. Сябры Партыі БНФ звярталіся да ўладаў, каб усталяваць у гэтых мясцінах нейкі памятны знак – яго было б відаць з шашы Р21, якая праходзіць у смаленскім накірунку. Аднак ім неаднаразова адмаўлялі ў ініцыятыве ўшанавання памяці… І добраўпарадкаванне самаробнага мемарыялу ў памяць пра трагічныя падзеі стала традыцыйным клопатам віцебскіх партыйцаў – штогод у апошніх датах траўня яны збіраюцца тут, каб выкасіць траву, прыбраць смецце, пасадзіць кветкі.
