Паштоўкі да палітвязняў, падпісаныя ў рамках акцыі “Свабода х2”, не дайшлі да адрасатаў
Дэпутат Еўрапарламента ад Польшчы Марэк Мігальскі
У Бюро еўрадэпутата Марка Мігальскага вярнулася пасылка з Беларусі з паштоўкамі палітвязням. Пасылка пазначана пячаткай "не положено". Яна ўтрымлівае болей за сотню паштовак са словамі падтрымкі палітвязням Міколу Статкевічу і Змітру Дашкевічу.
Знамянальна, што паштоўкі вярнуліся ў дзень, калі на волю выйшаў лідар "Маладога Фронту", - адзначае ініцыятар акцыі "Свабода х2" еўрадэпутат Марэк Мігальскі.
- Вярнулася з Беларусі каля ста паштовак, якія былі дасланыя палітвязням. Гэта парадаксальна, што як раз у дзень вызвалення Дашкевіча вярнуліся гэтыя паштоўкі, якія не былі яму перададзеныя. Гэтыя паштоўкі ў нас ў бюро і мы зноў іх вышлем у бліжэйшыя дні.
Цягам аднаго месяца паштоўкі са словамі падтрымкі беларускім палітвязням у рамках акцыі "Свабода х2" пераслалі звыш 1000 вядомых людзей з розных куткоў свету, між іншым міністр замежных спраў Польшчы Радаслаў Сікорскі ці дэпутаты Бундэстагу Бэрбель Кофлер і Ута Цапф.
