Мінгарсавет зацвердзіў памер даплат для сталічных медыкаў
Мінскі гарадскі савет дэпутатаў зацвердзіў памер штомесячных даплат для сталічных медработнікаў. Адпаведнае рашэнне №190 17 студзеня апублікавана на Нацыянальным прававым інтэрнэт-партале.
У пераліку работнікаў арганізацый аховы здароўя сталіцы, якія будуць атрымліваць штомесячныя даплаты да тарыфных ставак (акладаў), фігуруе 20 найменняў пасад.
Сярод іх дактары, сярэдні і малодшы медыцынскі персанал. Найбольшы памер даплаты — 1,04 млн рублёў — устаноўлены для хірургаў і анестэзіёлагаў — рэаніматолагаў. Найменшы — 195 тысяч — для сясцёр-гаспадынь, малодшых медсясцёр па доглядзе за хворымі, санітарак і нянь.
Памер даплаты для доктара-спецыяліста і фельчара (выязджае самастойна) УАЗ «Гарадская станцыя хуткай медыцынскай дапамогі» устаноўлены ў памеры 585 000 рублёў.
Раней паведамлялася, што на надбаўкі розным катэгорыям медыкаў у розных установах аховы здароўя з бюджэту Мінска на 2014 год выдзелена 171 млрд рублёў.
Увогуле, даплаты павялічваюцца ў сярэднім на 46%.
Рашэнне ўступае ў сілу пасля афіцыйнага апублікавання.
 |
