Бабруйск: суд прызнаў факт нанясення маральнай шкоды сябрам СПБ
Міхаіл Кавалькоў, бабруйскі лідэр Свабоднага прафсаюза Беларускага
Больш за год таму на інфармацыйных стэндах заводу ТДіА былі размешчаны плакаты, на якіх сябры СПБ былі "апрануты", з дапамогай фоташопу, у форму афіцэраў СС. Гэтая “творчасць” прадстаўнікоў завадской адміністрацыі абразіла свабодаўцаў, і яны выказалі намер звярнуцца ў міліцыю. Але там справу праз нейкі час закрылі з-за немагчымасці знайсці аўтараў плакатаў.
Старшыня завадской суполкі СПБ Міхаіл Кавалькоў тады адзначаў, што адзін з плакатаў правісеў чатыры дні на прахадной прадпрыемства наўпрост перад камерай відэаназірання.
Супрацоўнікі УУС накіравалі плакаты на экспертызу, там прызналі, што яны сапраўды абражаюць гонар і годнасць. Нечакана адказнасць за выраб плакатаў узяў на сябе начальнік аддзелу інфармацыі і сувязяў з грамадскасцю заводу ТДіА Аляксандр Шункевіч. Сябры СПБ звярнуліся ў суд.
Тры судовыя паседжанні прайшлі ў бягучым месяцы, апошняе адбылося ўчора, 30 ліпеня. Справу разглядала суддзя Ганна Герман. У якасці адказчыка праходзіў Аляксандр Шункевіч, у якасці сведкі Уладзімір Елісеенка, ідэолаг, ён жа намеснік дырэктара па кадрах.
На судзе Аляксандр Шункевіч сцвярджаў, што яго мэтай было "павесяліць людзей", таму ён і "апрануў" сябраў СПБ у форму афіцэраў СС. Казаў, што гэта быў яго адказ на галадоўку свабодаўцаў, якую ён лічыць фіктыўнай, гэткім "кіно".
Пасля разбіральніцтваў суд Ганна Герман празнала факт нанясення маральнай шкоды.
- Завод ТДіА павінен выплаціць на маю карысць 1 мільён 440 тысячаў рублёў, - распавёў Міхаіл Кавалькоў. - У гэтую суму ўвайшла кампенсацыя маральных пакутаў, юрыдычная кансультацыя і аплата дзяржаўнага мыта. Але маёй мэтай і не было атрымаць вялікую суму грошай. Мне было важна, каб супрацоўнікаў завадской адміністрацыі прызналі вінаватымі. Таму вынікам суда я цалкам задаволены, - адзначыў старшыня завадской суполкі СПБ.
