Баранавіцкі прадпрымальнік Мікола Чарнавус зноў выкліканы ў міліцыю на час мітынга ў Мінску
Мікалай Чарнавус.
На працоўнае месца баранавіцкага прадпрымальніка і актывіста Мікалая Чарнавуса ўдзень 27 лютага ўчастковы інспектар прынёс позву. У ёй паведамляецца, што 28 лютага ў 12 гадзін Чарнавус павінен з’явіцца да намесніка начальніка аддзела аховы правапарадку Сяргея Паўлені ў якасці сведкі. Па якой справе выклікаецца Мікалай Чарнавус у нядзелю ў міліцыю, участковы патлумачыць не змог.
М. Чарнавус упэўнены, што яго выклікаюць, як і мінулы раз, каб не даць магчымасці паехаць у Мінск на мітынг прадпрымальнікаў.
Нагадаем, што пад час пратэстаў прадпрымальнікаў за Чарнавусам сталі сачыць і ўжо трэці раз выклікаюць у міліцыю. Першы раз перад першым мітынгам прадпрымальнікаў у Мінску ад яго запатрабавалі падпісаць дакумент, што ён не будзе заклікаць прадпрымальнікаў да пратэстаў. Другі раз выклікалі да Сяргея Паўлені ў якасці сведкі па неіснуючай справе. Зараз сцэнар паўтарыўся. Чарнавус збіраецца звярнуцца ў пракуратуру са скаргай.
