Праваабаронцы выратавалі цэлы раён ад прымусовай працы
30 чэрвеня праваабаронцы атрымалі адказ на зварот аб незаконнасці прымусовага сенакосу ў Глускім раёне з Магілёўскага аблвыканкама.
Як вынікае з адказу, пакуль дзяржорганы перасылалі адзін аднаму зварот праваабаронцаў, Распараджэнне старшыні Глускага райвыканкама Царыкава У. ад 8 чэрвеня 2016 года “Аб аказанні дапамогі ў нарыхтоўцы кармоў” было адменена ім жа пасля агалоскі гэтага факту на сайце ПЦ “Вясна” і ў іншых СМІ у той самы дзень.
Нагадаем, 8 чэрвеня Глускім райвыканкамам было выдадзена Распараджэнне пад назвай “Аб аказанні дапамогі ў нарыхтоўцы кармоў”, у адпаведнасці з якім кіраўнікі арганізацый Глускага раёна павінны забяспечыць накіраванне “ва ўстаноўленым заканадаўствам парадку” супрацоўнікаў для нарыхтоўкі сена.
Згодна дадатку да Распараджэння, у працэс сенакосу было ўключана 34 прадпрыемствы і арганізацыі з Глуску і Глускага раёна, з разлікам нарыхтоўкі – 300 кг на аднаго чалавека, і планам агульнага накосу 337 600 кг сена.
Праваабаронцы ў той жа дзень звярнуліся ў пракуратуру Глускага раёна з патрабаваннем правесці пракурорскую праверку і адмяніць Распараджэнне. Аднак пракурор Леанід Палевіч ніякую праверку не праводзіў, а проста перанакіраваў зварот у Магілёўскі аблвыканкам.
Пасля гэтага праваабаронцы былі вымушаны звярнуцца ў пракуратуру Магілёўскай вобласці.
