Барысаў: За патрабаванне адстаўкі Міністра абароны Мацкевіча і Абрамовіча пакаралі штрафамі Дапоўнена
Плакат, з якім Алег Мацкевіч выйшаў на пікет 30 кастрычніка ў Барысаве.
Супрацоўнікі барысаўскай міліцыі затрымалі праваабаронцу Алега Мацкевіча, які выйшаў сёння пікет, каб патрабаваць адстаўкі Міністра абароны РБ Андрэя Раўкова і прыцягнення да крымінальнай адказнасці ўсіх вінаватых у смерці салдата тэрміновай службы Аляксандра Коржыча. Разам ім пікетаваў актывіст Алесь Абрамовіч, які таксама затрыманы.
Перад гэтым на сваёй старонцы ў фэйсбуку Мацкевіч змясціў фота плаката і лаканічны подпіс:
Кажуць, што ў чалавека заўсёды ёсьць выбар. Сёньня ў мяне яго няма. Я пайшоў...
Нагадаем, 13 кастрычніка Алег Мацкевіч накіраваў у Барысаўскі гарадскі выканаўчы камітэт заяўку на правядзенне 30 кастрычніка пікету на цэнтральнай плошчы горада, насупраць будынку Паўночна-заходняга аператыўнага камандавання. Нагодай для гэтага стала трагічная гібель салдата ў барысаўскіх Пячах.
Барысаўскі выканкам адмовіў праваабаронцу Алегу Мацкевічу ў правядзенні пікета 30 кастрычніка.
Акцыя пачалася ў 12 гадзін і доўжылася хвілін 15, затым да пікетоўцаў падыйшоў супрацоўнік міліцыі ў званні капітана і паведаміў ім аб затрыманні.
Пакуль вядома, што праваабаронцу Алега Мацкевіча, Алеся Абрамовіча, галоўнага рэдактара "Барысаўскіх навін" Анатоля Букаса, і фотажурналіста сайта ex-Press.by Паўла Сляпухіна якія знаходзіліся побач з пікетоўцамі, даставілі ў Барысаўскі РАУС.
Анатоля Букаса і журналіста Сляпухіна пасля праверкі дакументаў адпусцілі, а на астатніх склалі пратаколы адміністратыўнага правапарушэння. У гэты ж дзень адбыўся і суд над удзельнікамі пікету: Алегу Мацкевічу за ўдзел у несанкцыянаваным масавым мерапрыемстве (арт. 23.34 КаАП) суддзя Барысаўскага раённага суда Сяргей Герасімовіч прысудзіў штраф у памеры 30 базавых велічынь, а Алесю Абрамовічу - 50 базавых велічынь.
