Сяргей Пятрухін: “Паеду толькі з АМАПам, лежачы на падлозе бусіка каля іхніх ног”
Сяргей Пятрухін адразу пасля допыту. Фота: "Берасцейская Вясна".
Пасля ператрусу і допыту 30 жніўня берасцейскага блогера Сяргея Пятрухіна супрацоўнікі міліцыі Ленінскага РАУСа Берасця прымушаюць прайсці псіхіятрычную экспертызу ў межах заведзеных на яго крымінальных спраў. Блогера вінавацяць адразу па двух артыкулах Крымінальнага кодэкса: ч.2 арт. 188 КК РБ (паклёп) і ч.2 арт. 189 КК РБ (абраза). Пра гэта Пятрухін распавёў праваабаронцам адразу пасля вызвалення з аддзялення міліцыі.
Ён таксама падзяліўся акалічнасцямі свайго брутальнага затрымання з журналістамі “Берасцейскай Вясны”:
"Паставілі на калені ў майтках пры панятой, жанчыне. Кіраўнік групы заламіў закаваныя за спіной рукі ўгару і распляскаў мой твар па падлозе, сеўшы мне на карак. Падчас ператрусу мне часова знялі кайданкі і далі апрануцца, забралі сістэмны блок, ноўтбук, тэлефон і наклалі арышт на маёмасць адпаведна ордэра следчага па маёй крымінальнай справе Андраніка Хачатрана. Па завяршэнні ізноў начапілі кайданкі. У бусе амапаўцы кінулі мяне на падлогу і адвезлі ў Ленінскі РАЎС".
Праваабаронца Уладзімір Вялічкін лічыць, што ўлады намагаюцца “заткнуць рот” вядомаму відэаблогеру, запалохаць яго, каб адхіліць ад грамадзкай дзейнасці, а заадно запалохаць і насельніцтва. Улады відавочна правакуюць выбух грамадзкага абурэння...
Пазней Сяргей Пятрухін выказаўся наконт неабходнасці прайсці экспертызу ў сацыяльных сетках:
“Паеду толькі з АМАПАМ, лежачы на падлозе бусіка каля іхніх ног”
