Валанцёрская служба запрашае на анлайн-сустрэчу з псіхалагіняй Таццянай Палхоўскай
Валанцёрская служба "Вясны" запрашае на анлайн-сустрэчу з псіхалагіняй, сямейнай псіхатэрапеўткай, бізнэс-трэнеркай Таццянай Палхоўскай. Мерапрыемства адбудзецца ў ZOOM 2 траўня ў 18 гадзін.
Таццяна Палхоўская спецыялізуецца на тэмах эмоцый, іх пражывання і выказвання, пазнання і прыняцця сябе, развіцця сваёй індывідуальнасці і рэсурснасці, адносінаў і ўзаемадзеянні з людзьмі.
Псіхалагічная сустрэча будзе прысвечаная эмацыйнай сфэры пад кодавай назвай - ''Прыняць нельга падавіць''.
Вы калі-небудзь сутыкаліся:
- з нечаканым гневам вашых блізкіх ці сяброў?
- з раздражненнем свайго выкладчыка ці кіраўніка?
- хамствам на вуліцы?
Ці можа быць самі не маглі даць рады з гневам? Можа вам знаёма пачуцьцё трывогі, якое незразумела адкуль прыходзіць і суправаджае вас увесь дзень? Ці не сыходзіць віна, за якую вас даўно прабачылі, але вы не можаце прабачыць сабе?
На гэтыя і іншыя пытанні вы зможаце знайсці адказы падчас мерапрыемства.
"Тэма, якая будзе разглядацца - базавая, без яе няма сэнсу пачынаць любую іншую тэму ў псіхалогіі. Яна сапраўды фундаментальная! Варта вам толькі ёю авалодаць, і вы ўжо навучыцеся разумець сябе, людзей вакол вас, іх матывы і рэакцыі", - кажа Таццяна Палхоўская.
Удзел у анлайн-сустрэчы бясплатны, але неабходна рэгістрацыя.
