Платформа грамадзянскай салідарнасці заклікае вызваліць Марфу Рабкову

30.09.2020 Тэгі: палітвязні, заявы, міжнародная салідарнасць праваабаронцаў Асобы: Марфа Рабкова

https://spring96.org./be/news/99742 2020 2020-09-30T09:32:47+0300 2020-09-30T09:32:47+0300 2020-09-30T09:37:30+0300 be https://spring96.org./files/images/sources/marfa_rabkova_o.jpg Праваабарончы цэнтр «ВЯСНА» Праваабарончы цэнтр «ВЯСНА» Праваабарончы цэнтр «ВЯСНА»

Праваабарончы цэнтр «ВЯСНА»

Марфа Рабкова. Фота са старонкі ў Фэйсбуку

Заява Платформы грамадзянскай салідарнасці

29 верасня 2020 г.

Мы, ніжэйпадпісаныя сябры міжнароднай сеткі НДА “Грамадзянская платформа салідарнасці”, выказваем моцнае абурэнне з нагоды арышту і крымінальнага пераследу беларускай праваабаронцы Марфы Рабковай, каардынатаркі валанцёрскай службы Праваабарончага цэнтра "Вясна", і патрабуем яе неадкладнага і безумоўнага вызвалення і зняцця з яе ўсіх абвінавачванняў.

Праваабарончы цэнтр "Вясна" з'яўляецца арганізацыяй-сябрам Платформы грамадзянскай салідарнасці і лаўрэатам прэміі "Абаронца дэмакратыі" ў 2020 годзе, заснаванай дзяржавамі-ўдзельніцамі АБСЕ.

Марфа Рабкова і яе муж Вадзім Жаромскі былі затрыманыя 17 верасня ў Мінску супрацоўнікамі Галоўнага ўпраўлення па барацьбе з арганізаванай злачыннасцю і карупцыяй МУС. У іх кватэры быў праведзены ператрус, канфіскаваныя грошы, асабістыя рэчы і абсталяванне. Пазней Вадзім Жаромскі быў вызвалены, а Марфа Рабкова змешчаная пад варту ў якасці падазраванай паводле арт. 293, ч. 3 Крымінальнага кодэкса (Навучанне альбо іншая падрыхтоўка асобаў да ўдзелу ў масавых беспарадках альбо фінансаванне такой дзейнасці), які прадугледжвае пакаранне ў выглядзе пазбаўлення волі на тэрмін да трох гадоў. 19 верасня яе перавялі ў СІЗА № 1 г. Мінска, дзе яна ўтрымліваецца ў цяперашні час. 25 верасня ёй было афіцыйна прад'яўлена абвінавачанне па арт. 293, ч. 3 Крымінальнага кодэкса.

Беларускія праваабарончыя грамадскія арганізацыі лічаць Марфу Рабкову палітвязнем. Amnesty International прызнала яе вязнем сумлення. Яна была затрыманая пасля шэрагу актаў ціску з боку праваахоўных органаў і судовага пераследу праваабаронцаў з часу абвяшчэння вынікаў прэзідэнцкіх выбараў 9 жніўня. Гэтыя дзеянні могуць перашкодзіць прасоўванню і абароне правоў чалавека ў Беларусі.

Мы лічым, што беларускія ўлады пераследуюць спадарыню Рабкову выключна за мірную і законную праваабарончую дзейнасць, у тым ліку назіранне за акцыямі пратэсту і дакументаванне доказаў парушэнняў правоў чалавека, уключаючы катаванні і жорсткае абыходжання з мірнымі дэманстрантамі, затрыманымі супрацоўнікамі праваахоўных органаў. Марфа Рабкова не ўчыніла ніякага злачынства і таму няма падставаў для яе пераследу. Яе затрыманне, утрыманне пад вартай і пераслед з'яўляюцца помстай за праваабарончую дзейнасць і складаюць сур'ёзнае парушэнне абавязацельстваў Беларусі ў межах міжнароднага права ў галіне правоў чалавека і АБСЕ.

Мы патрабуем ад беларускіх уладаў неадкладнага і безумоўнага вызвалення Марфы Рабковай, спынення крымінальнай справы супраць яе і гарантавання яе фізічнай і псіхалагічнай бяспекі і недатыкальнасці. Улады таксама павінны спыніць ціск і пераслед у дачыненні да сябраў Праваабарончага цэнтра "Вясна" і ўсіх беларускіх праваабаронцаў і гарантаваць, каб усе праваабаронцы ў Беларусі маглі весці законную праваабарончую дзейнасць, не баючыся рэпрэсій, без усялякіх абмежаванняў і пры любых абставінах.

Мы заклікаем выканаўчыя і палітычныя органы, установы і дзяржавы-ўдзельніцы АБСЕ прыняць актыўныя грамадскія, дыпламатычныя і іншыя меры, каб забяспечыць неадкладнае вызваленне беларускай праваабаронцы Марфы Рабковай і спыненне пераследу супраць яе.

Цэнтр развіцця дэмакратыі і правоў чалавека, Расія

Нідэрландскі Хельсінкскі камітэт

Freedom Files, Польшча

Грамадскае аб'яднанне “Праваабарончы рух: Бір Дуйно Кыргызстан”

Цэнтр грамадзянскіх свабод, Украіна

Фонд прасоўвання грамадзянскай супольнасці і правоў чалавека “Жанчыны Дона”, Расія

Фонд “Грамадскі вердыкт”, Расія

Балгарскі Хельсінкскі камітэт

Хельсінкская грамадзянская асамблея - Ванадзор, Арменія

Шведская сетка АБСЕ

Інфармацыйна-аналітычны цэнтр "Сава", Расія

Хельсінкскі камітэт Арменіі