Андрусь Кашэўскі абвесціў галадоўку

Беспадстаўна арыштаваны і асуджаны на 15 сутак сябра БХД Андрусь Кашэўскі, які адбывае пакаранне ў ізалятары-размеркавальніку на Акрэсціна, абвесціў галадоўку.

 Пра гэта прэсавай службе БХД паведаміла праваабаронца Наста Лойка. Стаў вядомы артыкул, паводле якога асуджаны Кашэўскі – дробнае хуліганства. Апроч гэтага актывісту, якога затрымалі каля менскага метро 3 сакавіка, спрабавалі далучыць абвінавачанне ў супраціве міліцянтам пры затрыманні. Аднак ні складзены пратакол, ні пастанову суду Ленінскага раёна Менску Крашэўскаму не паказалі.

 Нагадаем, сябра БХД са Смалявічаў Андрусь Кашэўскі, які збіраўся балатавацца ў Жодзінскі гарсавет, быў затрыманы вечарам 3 сакавіка ў Менскім метро.

 Актывіста даставілі ў суд Ленінскага раёна, дзе ў той жа вечар адбыўся суд. Суддзя Навіцкая прысудзіла актывісту 15 сутак зняволення.

 У сталіцы Андрусь займаецца распаўсюдам газеты “Народная Воля”.