Гомельскага маладафронтаўца затрымалі за ўлёткі
26 красавіка ў Гомелі за распаўсюд улётак быў затрыманы маладафронтавец Антось Назаранка. Міліцыянты паводзілі сябе ветліва, але разам з улёткамі канфіскавалі падпісныя блянкі з подпісамі “За беларускую мову”.
Антось расклейваў увечары улёткі зь інфармацыяй пра Малады Фронт ля прыпынкаў транспарту. Каля адзінаццатай гадзіны вечара яго затрымалі міліцыянты й адвялі ў пастарунак, дзе канфіскавалі блізу 80 інфармацыйных улётак і некалькі аркушоў з подпісамі ў падтрымку беларускай мовы.
Прыблізна празь дзьве гадзіны юнака адпусьцілі й паведамілі, што канфіскаваныя аркушы, магчыма, вернуць, калі яны не спатрэбяцца міліцыі.
Хлопец апавядае, што у пастарунку, нягледзячы на позьні час сабралося дзесяць міліцыянтаў “паглядзець на апазыцыянэра”, усе паводзілі сябе вельмі ўважліва, большасьць нават добра ставіліся, што было бачна па зваротах, нэгатыў сыходзіў толькі ад нямногіх.
