Салігорск: Ніводнага подпіса ў падтрымку Кастусёва

Ініцыятыўныя групы па вылучэнні кандыдатаў падзяліліся інфармацыяй аб сабраных подпісах. Найбольшую колькасць набралі прыхільнікі Някляева. А вось у падтрымку Рыгора Кастусёва ніводнага подпісу ў Салігорскі выбаркам здадзена не было.

Таццяна Кучынская, кіраўніца перадвыбарчага штабу Уладзімера Някляева, агучыла лічбу ў 6450 перададзеных подпісаў па Салігорску. Яшчэ 269 подпісаў было сабрана ў Любані. Кіраўніца штабу Яраслава Раманчука Ларыса Насановіч заявіла пра больш чым чатыры тысячы подпісаў. Ініцыятыўная група Андрэя Саннікава назбірала ў сталіцы шахцёраў тры з паловай тысячы подпісаў у падтрымку свайго кандыдата. Замыкае групу цяжкавагавікоў Алесь Міхалевіч з 2594 подпісамі.

Не самы кепскі вынік у Мікалая Статкевіча. Больш за тысячу подпісаў. Сапраўднай сенсацыяй стала колькасць сабраных подпісаў па Салігорску за Рыгора Кастусёва. А дакладней не сабраных. Ніводнага подпісу ў падтрымку кандыдата ад БНФ у раённую выбарчую камісію перададзена не было.

Нагадаем, што большасць сяброў ініцыятыўнай групы У.Някляева складалі прадпрымальнікі і моладзь. Яраславу Раманчуку на дапамогу прыйшоў мясцовы актыў Аб'яднанай грамадзянскай партыі ды пенсіянеры. Апошнія дапамагалі і Андрэю Саннікаву. А вось падтрымку ў зборы подпісаў Алесю Міхалевічу аказалі сябры Беларускага незалежнага прафсаюза. 

Ініцыятыўныя групы іншых незалежных кандыдатаў актыўнасці ў Салігорску не праяўлялі.

“Праваабаронцы за свабодныя выбары”