Следства па крымінальнай справе Андрэя Пачобута скончана
Андрэй Пачобут, публіцыст і блогер, уласны карэспандэнт выдання Gazeta Wyborcza
Стала вядома, што сёння, 12 траўня, гарадзенскаму журналісту Андрэю Пачобуту афіцыйна паведамяць пра заканчэнне следства па крымінальнай справе. Нагадваем, што публіцыста вінавацяць за яго крытычныя артыкулы ў асабістым блогу і польскай “Gazece Wyborczej” адразу па двух артыкулах Крымінальнага кодэксу: 368 – частка 1 (абраза прэзідэнта Рэспублікі Беларусь) і 367 – частка 1 (паклёп на прэзідэнта Рэспублікі Беларусь). Далей пойдзе працэс азнаямлення са справай. Не выключана, што ўжо ў бліжэйшы час можа пачацца судовы працэс. Андрэй Пачобут за кратамі ўжо больш месяца – быў змешчаны ў турму 6 красавіка бягучага году. Тым часам у Гродне незарэгістраваным “Саюзам палякаў у Беларусі” створаны камітэт у дапамогу сям’і Андрэя Пачобута, які мае на мэце матэрыяльнаю падтрымку блізкіх журналіста.
“Праваабарончая хроніка”
